ესპანეთის ეროვნული ნაკრების მთავარმა მწვრთნელმა, ლუის დე ლა ფუენტემ, 2026 წლის მსოფლიო ჩემპიონატის მოგების შემდეგ უზარმაზარი ბედნიერება გამოხატა და აღნიშნა, რომ ეს წარმატება წლების განმავლობაში გაწეული გუნდური მუშაობისა და ერთგულების შედეგია.
მან განსაკუთრებული ქებით მოიხსენია თავისი ფეხბურთელები, რომლებმაც ტურნირის განმავლობაში უმაღლესი დონე აჩვენეს.
„უზარმაზარ სიამაყეს ვგრძნობ ამ თაობის ფეხბურთელების მიმართ. მათ განაგრძეს ამ იდეის განვითარება, ბოლომდე ერთგულნი დარჩნენ მისი და მუდმივად ცდილობდნენ მის გაუმჯობესებას.
ამ ფეხბურთელებმა აჩვენეს, როგორი უნდა იყოს ნამდვილი ჯგუფი, გუნდი და ოჯახი. ისინი შესანიშნავი მოთამაშეები არიან, გამორჩეული ნიჭითა და უდიდესი პოტენციალით.
ყველაზე მეტად კი ვამაყობ იმით, რომ პატივი მქონდა, ამ გზაზე მათთან ერთად ვყოფილიყავი.
ჩვენ ყველა ასაკობრივ კატეგორიაში მოვიგეთ და ერთად ვიზრდებოდით. ეს არის გუნდი, რომელსაც აქვს ნიჭი, მიზანდასახულობა, ერთგულება და სწორი ღირებულებები.
თანაც ისინი ჯერ კიდევ ახალგაზრდები არიან და კიდევ ბევრი შეუძლიათ. უკვე ვეკითხებოდით საკუთარ თავს, კიდევ რა დაგვრჩა მოსაგები? ამ გუნდმა დაღლა საერთოდ არ იცის.
ძალიან ემოციური ვარ. ფეხბურთელებთან ბევრი ვისაუბრეთ. ჩვენ ყველაფერი მოვიგეთ.
ეს არის თაობა, რომელიც მაგალითი უნდა იყოს როგორც სპორტისთვის, ისე ესპანელი ახალგაზრდებისთვის. ერთად ყოველთვის უფრო ძლიერები ვართ და ამაში ეჭვი არავის უნდა ეპარებოდეს.
ეს თამაში გაცილებით ადრე უნდა გადაგვეწყვიტა. ემილიანო მარტინესის ფანტასტიკურმა მოგერიებებმა არ მოგვცა შესაძლებლობა, ანგარიში უფრო კომფორტული გაგვეხადა.
ეს მსოფლიო ჩემპიონატის ფინალია და მაშინაც კი, როცა მეტოქე ათი კაცით თამაშობს, ტანჯვა გარდაუვალია.
ჩვენ კი, როგორც ჩანს, ტანჯვა გვიყვარს და კიდევ ერთხელ დავამტკიცეთ, რომ ყველაფრისთვის მზად ვართ. გამარჯვება წარმოუდგენლად რთულია და სწორედ ამიტომ უნდა დავაფასოთ ის.“ - განაცხადა დე ლა ფუენტემ.
