როდრი ფეხბურთის ისტორიაში მხოლოდ მე-11 მოთამაშე გახდა, რომელმაც მსოფლიო ჩემპიონატი, ჩემპიონთა ლიგა და ოქროს ბურთი მოიგო.
ესპანეთის ნაკრების კაპიტანმა ისტორიულ ტრებლს 2026 წლის მსოფლიო ჩემპიონატის ფინალში მიაღწია, სადაც „ლა როხამ“ დამატებით დროში არგენტინა 1:0 დაამარცხა.
როდრი ესპანეთის წარმატების ერთ-ერთი მთავარი შემოქმედი იყო. მიმდინარე მუნდიალზე მან ყველაზე მეტი ზუსტი გადაცემა შეასრულა, ყველაზე დიდი დისტანცია დაფარა და ყველაზე მეტი ჩართულობა (ბურთთან შეხება და სათამაშო ეპიზოდებში მონაწილეობა) დააგროვა ყველა ფეხბურთელს შორის.
როდრი იმ ათ ფეხბურთელს შეუერთდა, რომლებმაც მსოფლიო ჩემპიონატი, ჩემპიონთა ლიგა და ოქროს ბურთი კარიერის განმავლობაში მოიგეს.
ამ უნიკალური კლუბის პირველი წევრი სერ ბობი ჩარლტონი იყო. XX საუკუნეში მას ასევე შეუერთდნენ გერმანელები გერდ მიულერი და ფრანც ბეკენბაუერი, ასევე იტალიის 1982 წლის მსოფლიო ჩემპიონატის გმირი პაოლო როსი.
2002 და 2003 წლებში ამ სიას ზინედინ ზიდანი და რივალდო დაემატნენ, ხოლო მოგვიანებით, 2006 და 2007 წლებში, ბრაზილიელები რონალდინიო და კაკა.
15 წლის შემდეგ, არგენტინის მსოფლიო ჩემპიონობის წყალობით, ამ პრესტიჟულ სიაში ლიონელ მესიც შევიდა, ხოლო 2025 წელს მეათე წევრი საფრანგეთის ნაკრების ვარსკვლავი უსმან დემბელე გახდა.
ახლა კი, 2026 წლის მსოფლიო ჩემპიონობის შემდეგ, ამ ისტორიულ და გამორჩეულ სიაში საკუთარი ადგილი როდრიმაც დაიკავა.
