დიასის ბენეფისი - ალონსოს ენფილდზე დაბრუნება წარუმატებელი აღმოჩნდა

უეფას ჩემპიონთა ლიგის მე-4 ტურის მატჩში ლივერპულმა ბაიერ ლევერკუზენი მიიღო. ჩაბი ალონსოს დაბრუნება ენფილდზე მერსისაიდელთა მეტოქე გუნდის მთავარი მწვრთნელის რანგში წარუმატებელი აღმოჩნდა.

პირველი ტაიმი უგოლოდ დასრულდა, თუმცა მასპინძლებმა გარდამტეხი უპირატესობა მეორე ტაიმში მოახერხეს. წითლებმა 2-წუთიან მონაკვეთში მოახერხეს 2 გოლის გატანა. 61-ე წუთზე ანგარიში ლუის დიასმა გახსნა, 63-ე წუთზე კი კოდი გაკპომ გაზარდა უპირატესობა ორამდე.

მატჩის ბოლოს ლივერპულმა კიდევ 2 გოლის გატანა შეძლო. თავი კვლავ ლუის დიასმა გამოიჩინა. კოლუმბიელმა 83-ე და 92-ე წუთზე გატანილი გოლებით ჰეთ-თრიქი შეასრულა და ანგარიში გამანადგურებელი გახადა.

დიასის გარდა გამოსარჩევი იყო მოჰამედ სალაჰის თამაშიც, რომელმაც 2 საგოლე გადაცემა მიითვალა.

ლივერპულმა ჩემპიონთა ლიგის საწყისი 4 მატჩიდან ოთხივე მოიგო და 12 ქულით ცხრილს სათავეში ჩაუდგა. არნე სლოტის გუნდის ბურთების შეფარდებაც შთამბეჭდავი აქვს - 10:1. ლევერკუზენი კი 4 მატჩის შემდეგ 7 ქულით ამ მომენტისთვის მე-11 ადგილზეა.