დილა ერთ-ერთმა ლიდერმა დატოვა - ანდრონიკაშვილი უზბეკეთში მიდის

ეროვნული ლიგის მოქმედ ვიცე-ჩემპიონ და თასის გამარჯვებულ დილა გორის ერთ-ერთი ლიდერი, სანდრო ანდრონიკაშვილი კარიერას უზბეკეთის ჩემპიონატში გააგრძელებს.

სოციალური მედია 90 წუთის ინფორმაციით, ფეხბურთელს შიდა ქართლურ კლუბთან კონტრაქტის ვადა ამოეწურა და 2026 წლიდან უზბეკურ ანდიჯონში ითამაშებს.

ანდიჯონს 2024 წელს ქვეყნის თასი აქვს მოგებული, 2025-ში კი სუპერ თასის ფინალში დამარცხდა - 61-წლიან ისტორიაში მეტი გამორჩეული მიღწევა არ აქვს. უზბეკეთის სუპერ ლიგის 2025 წლის სეზონი მე-11 ადგილზე დაასრულა.

26 წლის უნივერსალი მცველი, რომელმაც ეროვნული ლიგის გასულ სეზონში უფრო ხშირად ნახევარდაცვის ცენტრში ითამაშა, დილაში 2023 წლის ზაფხულში გადავიდა.

2025 წლის სრულ სეზონში, ყველა ტურნირის ეგიდით, 40 მატჩში მიიღო მონაწილეობა და 15 საგოლე მოქმედება შეასრულა - 11 გოლი და 4 ასისტი.

შეგახსენებთ, დილამ თავისი კიდევ ერთი გამორჩეული ფეხბურთელი, სირილ ედუძი დანიურ რანდერსში გაყიდა.