დინამო თბილისთან მატჩისას, დილა გორის კაპიტანმა, რომარიკ ეტოუმ მძიმე დაზიანება მიიღო და სასწრაფო დახმარების მანქანით კლინიკაში გადაიყვანეს. მისი კლუბი განცხადებას ავრცელებს.
"ძვირფასო გულშემატკივრებო, გვსურს, გაცნობოთ, რომ გუშინდელ მატჩში მომხდარი ინციდენტის შემდეგ, რომელშიც ჩვენი გუნდის კაპიტანმა რომარიკ ეტოუმ მძიმე დაზიანება მიიღო, საბედნიეროდ, ადგილზე მოხდა დროული და ეფექტური რეაგირება, რის შედეგადაც, ფეხბურთელის მდგომარეობა დასტაბილურდა და მის სიცოცხლეს საფრთხე არ ემუქრება.
ამ მომენტისთვის, იგი კლინიკაშია მოთავსებული სადაც სახის არეში მიღებული მრავლობითი მოტეხილობების გამო საჭირო გახდა ქირურგიული ჩარევა, რომარიკს უკვე ჩაუტარდა ოპერაცია და მიმდინარეობს ყველა საჭირო კვლევა შემდგომი რეაბილიტაციის პროცედურისთვის. გუნდის სახელით, ჩვენს კაპიტანს სწრაფ გამოჯანმთელებას ვუსურვებთ", - აღნიშნულია დილას განცხადებაში.
31 წლის ცენტრალური მცველი დინამოსთან მატჩის 26-ე წუთზე გაითიშა, რის გამოც შეხვედრა 23 წუთის განმავლობაში შეჩერებული იყო. საბოლოოდ, თამაში 0:0 დასრულდა.
VIDEO: უგოლო ფრე გორში - დინამომ მეორე ადგილი დაკარგა
