ჩოგბურთის კეთილსინდისიერების საერთაშორისო სააგენტომ (ITIA) ჩოგბურთის ანტიდოპინგური პროგრამის ფარგლებში ნიკ კირიოსს დროებითი დისკვალიფიკაცია მისცა.
კირიოსს დისკვალიფიკაცია მას შემდეგ შეუფარდეს, რაც ივნისში, მალიორკაში გამართულ ATP 250-ის ტურნირზე ჩატარებულმა საშეჯიბრო დოპინგ-ტესტმა მის ორგანიზმში კოკაინის კვალი აღმოაჩინა.
ნიკ კირიოსმა სოციალურ ქსელში განცხადება გაავრცელა:
„მინდოდა, ეს ამბავი პირველ რიგში ჩემგან გაგეგოთ.
ცოტა ხნის წინ მალიორკაში დოპინგ-ტესტი ჩავაბარე, რომელმაც კოკაინზე დადებითი შედეგი აჩვენა. ძალიან დიდი შეცდომა დავუშვი და ამაზე სრულ პასუხისმგებლობას ვიღებ.
ბოდიშს ვუხდი ჩემს გულშემატკივრებს, ოჯახს, სპონსორებსა და ყველა ჩემთვის ახლობელ ადამიანს. ყველაზე მეტად კი ბოდიშს ვუხდი ბავშვებს, რომლებიც თვალს მადევნებენ. მესმის, როგორი მაგალითია ეს მათთვის და საკუთარი თავით ძალიან იმედგაცრუებული ვარ.
თავის მართლებას არ ვაპირებ, თუმცა მსურს გარკვეული კონტექსტი მოგაწოდოთ იმის შესახებ, თუ რა მდგომარეობაში ვიყავი. ბოლო რამდენიმე წლის განმავლობაში ტრავმებმა ჩემზე უდიდესი გავლენა მოახდინა, როგორც ფიზიკურად, ისე ფსიქოლოგიურად.
ჩემს სხეულს აღარ შეეძლო იმის გაკეთება, რასაც გონება მისგან მოითხოვდა, ხოლო იმის გააზრება, რომ ჩემი კარიერის დასასრულს ვუახლოვდები, იმაზე ბევრად რთული აღმოჩნდა, ვიდრე ოდესმე წარმომედგინა.
ყოველთვის ვამბობდი, რომ ჩოგბურთი მე არ ამირჩევია, ჩოგბურთმა ამირჩია. თუმცა იმის დათმობა, რაც მთელი ჩემი ცხოვრება იყო, ერთ-ერთი ყველაზე რთული რამაა, რის წინაშეც ოდესმე აღმოვჩენილვარ. ზოგჯერ თავს უმწეოდ და მარტოდ ვგრძნობდი.
არცერთი ეს გარემოება ჩემს საქციელს არ ამართლებს.
თუმცა კარგი ის არის, რომ მომხდარი ჩემთვის სერიოზული გამოფხიზლება აღმოჩნდა. მომდევნო 28 დღის განმავლობაში სოციალურ მედიასა და საჯარო ცხოვრებას ჩამოვშორდები და საკუთარ თავზე მუშაობას დავუთმობ დროს.
გთხოვთ, ამ პერიოდში პატივი სცეთ ჩემს პირად სივრცეს და, რაც ყველაზე მნიშვნელოვანია, ჩემი ოჯახის კონფიდენციალურობას.
ბოდიშს გიხდით. საკუთარ თავზე ვიმუშავებ და უკეთესი დავბრუნდები." - წერს ავსტრალიელი ჩოგბურთელი ინსტაგრამზე.
