ენდრიკის ეფექტი: ლიონმა უმნიშვნელოვანესი სამი ქულა მოიპოვა

რეალის იჯარით გაშვებულმა ენდრიკმა პაულო ფონსეკას კრიტიკას პასუხი გასცა.

ენდრიკმა ლორიენთან მატჩში ბრწყინვალე თამაში აჩვენა და საკუთარი გუნდის გამარჯვებაში უდიდესი როლი ითამაშა. მას შემდეგ, რაც მწვრთნელმა ბრაზილიელ ტალანტს ფორმის გაუმჯობესებისკენ მოუწოდა, ენდრიკმა მოედანზე შესვლისთანავე საგოლე პასი მიითვალა და მეორე გოლშიც მიიღო მონაწილეობა.

ფონსეკა ახალგაზრდა ვარსკვლავისგან მეტს ითხოვს

კვირას გამართულ შეხვედრამდე ფონსეკამ ახალგაზრდა თავდამსხმელზე საუბრისას თავი არ შეიკავა. იმის ფონზე, რომ ლიონი საშინელ ფორმაში იყო და ზედიზედ ცხრა მატჩი ვერ იგებდა, მწვრთნელმა ენდრიკს მკაფიო გზავნილი გაუგზავნა: „ის ვალდებულია, უფრო მეტი გააკეთოს“. ფონსეკამ ხაზი გაუსვა მოზარდის მნიშვნელობას კლუბის ბრძოლაში ევროტურნირების საგზურისთვის. შესაბამისად, ლორიენთან მატჩის სასტარტო შემადგენლობაში მის ნაცვლად რაშიდ ღეზალის დაყენება, რაც ერთგვარი გაფრთხილება იყო.

ამ შეხვედრამდე ბრაზილიელმა ლიონის მაისურით ყველა ტურნირზე 1286 წუთი დაჰყო მოედანზე, ჩაატარა 18 მატჩი, გაიტანა 6 გოლი და გააკეთა 5 შედეგიანი გადაცემა. უშუალოდ ლიგა 1-ში მის ანგარიშზე 10 მატჩში 3 გოლი და 4 ასისტი იყო. მიუხედავად სოლიდური სტატისტიკისა, მას დავალებული ჰქონდა, რომ თამაში კიდევ უფრო გაეუმჯობესებინა. უფერული პირველი ტაიმის შემდეგ, ფონსეკამ შესვენებაზე სამმაგი ცვლილება გააკეთა და მოედანზე ენდრიკი, კორენტენ ტოლისო და ორელ მანგალა შეიყვანა, რამაც გაამართლა.

წინ პსჟ-სთან უმნიშვნელოვანესი მატჩია

ამ გამარჯვებით ლიონი ლიგა 1-ის სატურნირო ცხრილში მეხუთე ადგილზე დაბრუნდა და საუკეთესო სამეულს მხოლოდ ორი ქულით ჩამორჩება. ფონსეკას იმედი აქვს, რომ მისი გუნდი ამ იმპულსს შეინარჩუნებს, რადგან მომავალ უქმეებზე მათ პარიზში, პსჟ-ს წინააღმდეგ ურთულესი და პრინციპული დაპირისპირება ელით.