ექცევა თუ არა ფიფა არგენტინას მუნდიალზე განსაკუთრებულად?

არგენტინის ნაკრები მსოფლიო ჩემპიონის ტიტულის შესანარჩუნებლად ბოლომდე იბრძვის, თუმცა პლეი-ოფში კაბო ვერდესა და ეგვიპტესთან მოპოვებულ მძიმე გამარჯვებებს (3:2) დიდი ხმაური მოჰყვა.

მეტოქეები სულ უფრო ხშირად საუბრობენ მსაჯების აშკარა კეთილგანწყობაზე.

ეგვიპტის ნაკრების მთავარმა მწვრთნელმა, ჰოსამ ჰასანმა ფიფა პირდაპირ დაადანაშაულა: „ჩვენ უსამართლოდ მოგვექცნენ. შესაძლოა, მათ უბრალოდ სურდათ, რომ მესის ბრძოლა გაეგრძელებინა“.

აფრიკელებს VAR-ის ჩარევით მესამე გოლი გაუუქმეს, მოგვიანებით კი მსაჯმა მოჰამედ სალაჰზე აშკარა ფეხით კონტაქტის მიუხედავად პენალტი არ დანიშნა.

ეჭვები შვეიცარიასთან მეოთხედფინალშიც გამყარდა, როცა მსაჯმა პროტოკოლის დარღვევით, VAR-ის მინიშნებით, სიმულაციისთვის ბრილ ემბოლო გააძევა. გარდა ამისა, ინგლისთან ნახევარფინალში ენცო ფერნანდესმა მეტოქეს კისერში ხელი უკრა და წითელ ბარათს გადაურჩა, ხოლო გამარჯვების გოლისას მესიმ, შესაძლოა, წესი დაარღვია. თავად ლეო ტურნირის დასაწყისშივე, ალჟირთან უხეშობისთვის, დისკვალიფიკაციას გადაურჩა, რამაც მას 5 გოლის გატანის შანსი მისცა.

კონსპირაციის თეორიას კალენდარიც აძლიერებს - ფიფამ წილისყრის სისტემა ისე შეცვალა, რომ ტოპ-4 გუნდი ნახევარფინალამდე ერთმანეთს არ შეხვედროდა. ამით ყველაზე მეტად არგენტინამ იხეირა, რომელსაც ფინალამდე რეიტინგის ოცეულის მიღმა მყოფ გუნდებთან მოუწია თამაში.

შეთქმულების თეორიებისდა მიუხედავად, არგენტინა საკუთარი ძლიერი მენტალიტეტით და მსოფლიოს საუკეთესო ფეხბურთელით, შეუძლებელის გაკეთებას ახერხებს და ფინალში ესპანეთს ხვდება.