ექვსი წლის შემდეგ - რუსთავი ეროვნულ ლიგაში დაბრუნდა

საქართველოს ეროვნული ლიგა 2-ის 34-ე ტურში სატურნირო ცხრილის ლიდერი, რუსთავი დინამო თბილისი 2-ს დაუპირისპირდა და 3-0 დაამარცხა.

შეხვედრაში ანგარიში ნიკა ჯაფარიძემ გახსნა, რომელმაც ზედიზედ მე-2 მატჩში გამოიჩინა თავი და სეზონში მე-4 გოლი გაიტანა.

39-ე წუთზე ბრაზილიელმა ჟანმა გაზარდა სხვაობა ორამდე და თავისი მე-13 გოლი მიითვალა ამ სეზონში, მატჩს წერტილი კი განელმა ჯიბრილმა დაუსვა და გია ცეცაძის გუნდმა 3 ქულა ჩაიწერა აქტივში.

ამ შეხვედრის შემდეგ ბოლნისისა და სპაერის დაპირისპირება გაიმართა, რომელიც მასპინძელთა გამარჯვებით 3-0 დასრულდა. ბოლნისელებმა სამივე გოლი პირველივე ტაიმში გაიტანეს - სპაერის კარი მაქაცარიამ, სიჭინავამ და ასკურავამ აიღეს.

სპაერის ამ წაგებით კი სეზონის დასრულებამდე 2 ტურით ადრე ეროვნული ლიგა 2-ის ჩემპიონი გაირკვა და ეს რუსთავია, რომელიც მდევარს უკვე 7 ქულით უსწრებს.

შესაბამისად, რუსთავი რამდენიმეწლიანი პაუზის შემდეგ ეროვნულ ლიგაში ბრუნდება.

გუნდი საქართველოს უმაღლესი დივიზიონიდან 2019 წელს გავარდა, 2022 წელს რუსთავმა მეორე ლიგაშიც ვერ შეინარჩუნა ადგილი და დაქვეითდა, თუმცა ეროვნულ ლიგა 2-ში იმავე სეზონში დაბრუნდა.

რუსთავს ეროვნულ ლიგაში გადასვლის შანსი წინა სეზონშიც ჰქონდა, თუმცა პლეიოფში თელავთან დამარცხდა, წელს კი მათ მიზანს მიაღწიეს და მომავალ წელს უმაღლეს დივიზიონში გაატარებენ.