საქართველოს მოქმედი ჩემპიონი, იბერია 1999 ნიდერლანდების ნაკრების ყოფილ მცველ ტერენს კონგოლოს იმატებს.
GEO TEAM-ის ინფორმაციით, 31 წლის ცაცია ცენტრალური მცველი იბერიელებთან 1-წლიან კონტრაქტს გააფორმებს და გუნდს უკვე ხვალიდან, თურქულ შეკრებაზე შეუერთდება.
კონგოლო ფეიენოორდის აკადემიის აღზრდილია და პროფესიონალური კარიერის პირველი 5 წელიც დე კუიპზე გაატარა, სხვადასხვა დროს კი მონაკოს, ფულემის, ჰადერსფილდის, ლე ავრისა და ვენის რაპიდის რიგებში უთამაშია.
ტანმაღალ უკანახაზელს პრემიერ ლიგაში - 46, ხოლო ნიდერლანდების ერედივიზიეში 129 მატჩი აქვს ჩატარებული, საფრანგეთის ლიგა 1-ის ეგიდით კი მოედანზე 3-ჯერ გავიდა.
იგი 2016-17 წლების სეზონის ფეიენორდის წევრი იყო, როცა დირკ კიუიტი მშობლიურ გუნდში დაბრუნდა და ნიდერლანდების ჩემპიონობა 1998-99 წლების სეზონის შემდეგ პირველად მოაგებინა - კონგოლომ 23 მატჩში 1 გოლი და 2 ასისტი მიითვალა.
2024 წლის სექტემბრიდან გამოდიოდა ერედივიზიეს კლუბ ბრედაში, რომელიც 18 იანვარს, ურთიერთშეთანხმების საფუძველზე დატოვა.
კონგოლოს ნიდერლანდების 15; 16; 17; 18; 19; 20 და 21-წლამდელთა ნაკრების გარდა, ეროვნულ ნაკრებშიც უთამაშია - სულ 4 შეხვედრა აქვს ჩატარებული, მათ შორის ერთ-ერთი 2014 წლის მსოფლიო ჩემპიონატზე, ჩილეს წინააღმდეგ (ცვლილებაზე ბოლო წუთებზე შევიდა).
