სერ დევიდ ბექჰემი ბრიტანეთის მეფე ჩარლზ მესამემ ბუკინგემის სასახლეში რაინდად აკურთხა.
ინგლისის ნაკრების ყოფილი ფეხბურთელი სპორტსა და საქველმოქმედო საქმიანობაში გაწეული საქმიანობისთვის დააჯილდოვეს. ბექჰემს ბუკინგემის სასახლეში თან მისი მეუღლე, ვიქტორია და მშობლები, ტედი და სანდრა ახლდნენ.
„მონარქია ყოველთვის ძალიან მნიშვნელოვანი იყო ჩვენს ოჯახში. სამეფო ოჯახი ყოველთვის დიდ როლს თამაშობდა და ყოველთვის უდიდესი პატივისცემა მქონდა მათ მიმართ. როცა მსოფლიოს გარშემო ვმოგზაურობ და ადამიანები მეკითხებიან ჩვენს სამეფო ოჯახზე, ეს აჩვენებს, რამდენად დიდ პატივს სცემენ მათ.
დღეს აქ ყოფნა და მეფის ხელით რაინდად წოდება, მართლაც არარეალური განცდაა. უბრალოდ ვიმედოვნებდი, რომ ყველაფერს სწორად გავაკეთებდი. პროცედურებს წინასწარ გვიხსნიან, როგორ უნდა მოიქცე, და როცა ხედავ მის უდიდებულესობას, მეფეს, რომელიც გიღებს და ელეგანტურად და მომხიბვლელად იქცევა, ეს მართლაც განსაკუთრებული წამია.
როდესაც მითხრეს, რომ ეს პატივი მხვდა წილად, ეს მართლაც განსაკუთრებული მომენტი იყო. გამიმართლა, რომ კარიერაში ბევრი რამ მოვიგე, ვითამაშე ჩემი ქვეყნის ნაკრებში და ვყოფილვარ კაპიტანი, მაგრამ უდავოდ, ესაა ის მომენტი, რომელიც ყველაზე მეტად მეამაყება.
რამდენიმე მიზეზით, არა მხოლოდ ჩემი კარიერისთვის ან სპორტისთვის, არამედ საქველმოქმედო საქმიანობისთვის, რაც ჩემთვის ძალიან მნიშვნელოვანია. ჩემი საქველმოქმედო საქმე არასდროს ყოფილა ვალდებულება, ამას იმიტომ ვაკეთებ, რომ მიყვარს, იმიტომ რომ შემიძლია სხვების დახმარება და ცვლილების მოტანა. გულწრფელად რომ გითხრათ, განსაკუთრებით მნიშვნელოვანია რაინდის წოდების მიღება არა მხოლოდ სპორტში მიღწეული წარმატებებისთვის, არამედ იმ საქმისთვისაც, რასაც ბავშვებისთვის ვაკეთებ.
შესანიშნავია, რომ მაქვს პრემიერლიგის 6 ტიტული და რამდენიმე სხვა ჯილდო, მაგრამ ეს უდავოდ ჩემი ყველაზე საამაყო მიღწევა იქნება.“ - განაცხადა სერ დევიდ ბექჰემმა ჟურნალისტებთან.
