სეგუნდას მე-12 ტურში, ტენერიფესა და ანდორას შეხვედრის მიწურულს, მასპინძელთა თავდამსხმელმა ხესუს დე მიგელმა მეტოქის მეკარესთან შეჯახების შემდეგ გონება დაკარგა.
მეორე ტაიმის მეშვიდე დამატებულ წუთზე ანდორას მეკარემ, ხესუს ოვონომ, დე მიგელი მოედნის ცენტრში უხეშად წააქცია.
თავდამსხმელი სიღრმიდან გაკეთებული გადაცემის მიღებასა და მეკარესთან პირისპირ გასვლას ცდილობდა. ოვონომ პირდაპირი წითელი ბარათი მიიღო.
დე მიგელი მინდორზე დარჩა, რამდენიმე წამში კი ფეხბურთელებმა შენიშნეს, რომ მას გონება ჰქონდა დაკარგული. მოედანზე წითელი ჯვრის მედიკოსები შევიდნენ და დახმარებას რამდენიმე წუთის განმავლობაში უწევდნენ, რის შემდეგაც თავდამსხმელი საკაცით გაიყვანეს და სასწრაფო დახმარების მანქანით საავადმყოფოში გადაიყვანეს.
COPE-ს ინფორმაციით, ფეხბურთელს გულისცემა და სუნთქვა შეუჩერდა. იმავე წყაროს ცნობით, ის უკვე დამოუკიდებლად სუნთქავს, ექიმები კი მისი მდგომარეობის სტაბილიზაციაზე მუშაობენ.
ინციდენტის შემდეგ ტრიბუნებიდან ოვონოს მისამართით „მკვლელს“ სკანდირებდნენ.
