ესპანურმა გამოცემა Unión Rayo-მ საქართველოს ნაკრების ნახევარმცველ გიორგი წიტაიშვილს სტატია მიუძღვნა, სადაც ფეხბურთელის წარმატებულ დებიუტსა და მის ძირითად შემადგენლობაში დამკვიდრების შანსებზე საუბრობს.
თავისუფალი აგენტის სტატუსით რაიო ვალეკანოში გადასულმა 25 წლის ფეხბურთელმა მწვრთნელის, ბენიატ სან ხოსეს ნდობა უმოკლეს დროში მოიპოვა.
სექტემბრის დასაწყისში რასინგ სანტანდერთან (3:2) შეხვედრაში სათადარიგო სკამიდან ჩართვის შემდეგ, წიტაიშვილი ზედიზედ ორ რთულ მატჩში – სტუმრად რეალთან (1:4) და შინ ესპანიოლთან (2:1) უკვე სასტარტო შემადგენლობაში გამოჩნდა.
ადგილობრივი მედია წერს:
წიტაიშვილმა ისარგებლა ბენიატ სან ხოსეს მიერ მისთვის მიცემული შესაძლებლობით და რაიო ვალეკანოს შემადგენლობაში მნიშვნელოვანი როლის დაკავების გზაზეა. ქართველმა გარემარბმა რეალსა და ესპანიოლთან მატჩებში ძირითად შემადგნელობაში ითამაშა, რომლებშიც დრიბლინგის უნარი, სისწრაფე და გაბედულება წარმოაჩინა.
სტატიაში ხაზგასმულია, რომ ქართველი გარემარბი გუნდს განსხვავებულ დინამიკას სთავაზობს. გიორგი მუდმივად ეძებს თავისუფალ ზონებს და ვერტიკალურ თამაშს ავითარებს.
მიუხედავად იმისა, რომ ფრან პერესის დისკვალიფიკაციის მოხდისა და სხვა შემტევების დაბრუნების შემდეგ კონკურენცია გაიზრდება, წიტაიშვილის მიერ ნაჩვენებმა თამაშმა შესაძლოა მწვრთნელი იძულებული გახადოს,რომ სათამაშო დრო გიორგის სასარგებლოდ გაანაწილოს.
რაიო ვალეკანო ლა ლიგაში ჩატარებული 6 მატჩის შემდეგ 7 ქულით მე-11 ადგილზეა. მომდევნო შეხვედრას გუნდი 19 სექტემბერს სტუმრად ოსასუნასთან გამართავს, რის შემდეგაც წიტაიშვილი საქართველოს ეროვნული ნაკრების შეკრებას შეუერთდება.
