მანჩესტერ იუნაიტედის მცველმა, ჯონი ევანსმა პროფესიონალური კარიერა დაასრულა.
ჩრდილოეთ ირლანდიელმა მოთამაშემ პრემიერ ლიგაში 386 მატჩი ჩაატარა, მისმა გუნდმა კარი 97-ჯერ შეინახა, თავად 14 გოლი გაიტანა და პრემიერ ლიგის 3 ტიტული მოიგო.
კარიერის დასრულების შემდეგ 37 წლის ევანსი მანჩესტერ იუნაიტედში ახალ როლს მოირგებს. კლუბის ოფიციალური განცხადებით, ჯონი კარიერული განვითარების დეპარტამენტს უხელმძღვანელებს.
ევანსი პასუხისმგებელი იქნება ახალგაზრდა მოთამაშეების ინდივიდუალურ განვითარებაზე და მათ მომზადებაზე იუნაიტედის პირველი გუნდისთვის.
"მინდა ოფიციალურად გამოვაცხადო ჩემი სათამაშო კარიერის დასრულების შესახებ, არა სევდით, არამედ სიამაყითა და აღტაცებით, რადგან წინ ახალი თავი მელის.
სამუდამოდ ვალში ვიქნები მენეჯერების, მწვრთნელების, სტაფის და რა თქმა უნდა, ჩემი გუნდელების, რომლებთანაც მუშაობის პრივილეგია მქონდა 20 წლის განმავლობაში." - აცხადებს ევანსი.
