UFC 316-ზე შონ ო'მალისთან მოპოვებული გამარჯვებისა და ქამრის დაცვის შემდეგ, ქართველ ჩემპიონ მერაბ დვალიშვილს გავესაუბრეთ.
- მერაბ, დღეს შენი დამსახურებით მთელმა ქვეყანამ ბედნიერად გაიღვიძა, რას გადასცემდი იმ გულშემატკივარს, რომელიც გელოდება ახლა საქართველოში?
- პირველ რიგში, მადლობას ვეტყვი თითოეულ ქართველ გულშემატკივარს, რადგან ისინი არიან ჩემი მთავარი მოტივაცია და ბედნიერი ვარ, თუ შევძელი და გავახარე მათი გულები.
- ეს იყო უდიდესი გამარჯვება, არამარტო ქამრის დაცვის გამო. მთელი დღეა ინტერნეტი ლაპარაკობს, საუბრის მთავარი თემაა, რომ მერაბი ისევ აგრძელებს განვითარებას. შემდეგი ბრძოლები კიდევ უკეთესი იქნება?
- რა თქმა უნდა, მე ვვითარდები და ასე ვერ ვიტყვი შემდეგი ბრძოლა როგორი იქნება, რადგან ყველა ბრძოლა ინდივიდუალურია, მე ყოველ ჯერზე მაქსიმუმისთვის ვარ მზად და რა თქმა უნდა, თუ ფინიშით დავასრულებ, მაგას რა აჯობებს, მაგრამ მზად ვარ სრული ბრძოლისთვისაც.
ერთ რამეს ნამდვილად გპირდებით, რომ მე გაჩერებას არ ვაპირებ, განვვითარდები და გამარჯვებები ჯერ კიდევ წინ არის.
- ბრძოლამდე ჯონ ვუდთან გვქონდა ინტერვიუ და ხშირად ეკითხებოდნენ ფინიშებზე. ამბობდა, რომ ზუსტად ვიცით, სად არის ეგ სივრცე და ამ ბრძოლაში გაგაოცებთ. შენ უამრავ კითხვას გაეცი პასუხი, შენმა გუნდმა საოცარი შრომა ჩადეთ ამ ყველაფერში, რამაც შედეგი გამოიღო.
- კიდევ დიდი არსენალი მაქვს სხვადასხვა მტკივნეული ილეთის, მაგრამ ნელ-ნელა ალბათ ნახავს MMA-ის გულშემატკივარი. ამ დონეზე ყოველთვის ვერ შეძლებ მოწინააღმდეგის დაფინიშებას, ამჯერად ეს შევძელი. ქართველებს გვაქვს გამონათქვამი, რომ მოგებულს არ ასამართლებენ და როცა ჩემპიონი ხარ, სიმართლე გითხრათ, ფინიშით მოვიგებ თუ გადაწყვეტილებით, არ აქვს მნიშვნელობა.
ერთი რამე ფაქტია, რომ არ მინდა მსაჯების ხელში დავტოვო გადაწყვეტილება, რაც მოხდა ჩემი პირველი ბრძოლის დროს UFC-ში. მინდა, რომ ყოველთვის აშკარად მოვიგო და როგორც იქნება, ისე იქნება.
- გილოცავ კიდევ ერთხელ, წარმატებები, მთელი ქვეყანა შენ უკან ვდგავართ, ძალიან გვიხარიხარ და გგულშემატკივრობთ. ეჭვი არ გვეპარება, რომ საამაყო და აქტიური ჩემპიონი იქნები, რომელიც ჩვენს დროშას ხშირად ააფრიალებს.
- მადლობა, მე ყველაფერს გავაკეთებ, რომ რაც შეიძლება დიდხანს ვიყო ჩემპიონი, დიდხანს ვიბრძოლო ამ დონეზე და აქედან მოვუტანო ჩემს ქვეყანას პატარა წარმატება და ერთი აგური დავდო ჩვენი ქვეყნის პოპულარიზაციაში, რაც ჩვენნაირ პატარა ქვეყანას ნამდვილად სჭირდება.
მადლობას ვეტყვი თითოეულ ქართველ გულშემატკივარს, განსაკუთრებით ემიგრანტებს. ახალგაზრდა თაობას ვეტყვი, რომ ივარჯიშეთ, იცხოვრეთ ჯანსაღად და ყველაფერი შესაძლებელია. მე თუ გამომივიდა, გამოგივათ თქვენც.
ფოტოისტორია: მანქანა შეუჩერებელია - დვალიშვილის ქამრის დაცვა ო'მალისთან
