რობერტო სეხასი, რომელმაც 1986 წლის მსოფლიო ჩემპიონატის ფინალის შემდეგ დიეგო არმანდო მარადონას მხრებზე ატარებით თავისი სახელი უკვდავყო, 68 წლის ასაკში, მშობლიურ ქალაქ სანტა ფეში, ხანგრძლივი ავადმყოფობის შემდეგ გარდაიცვალა.
აცტეკას სტადიონზე გაკეთებული მისი სპონტანური მოქმედება ფეხბურთის ისტორიაში ერთ-ერთ ყველაზე იკონურ მომენტად იქცა: მარადონა, რომელსაც ხელში მსოფლიო ჩემპიონატის თასი უჭირავს, მხრებზე ჰყავს შემოსმული გულშემატკივარს, რომელმაც მატჩის სანახავად ათასობით კილომეტრი გაიარა.
იმ დროს, სეხასი ლითონის გადამამუშავებელ ქარხანაში მუშაობდა და მეგობრებთან ერთად გადაწყვიტა, მექსიკაში გამგზავრებულიყო, რათა გერმანიასთან ფინალი ენახა. ბილეთისა და აკრედიტაციის გარეშე, მან სტადიონზე შეპარვა მოახერხა და ფინალური სასტვენის შემდეგ მოედანზე ხალხში გადახტა. "დიეგომ შემომხედა, გაჩერდა და სიტყვის თქმის გარეშე მივხვდი, რომ უნდოდა, ზურგზე შემესვა. ეს გავაკეთეთ და ის მეუბნებოდა, საით უნდა წამეყვანა", - იხსენებდა სეხასი სხვადასხვა ინტერვიუებში.
ათწლეულების შემდეგ, ბედმა ისინი კვლავ შეახვედრა ერთმანეთს 2014 წლის ბრაზილიაში გამართულ მსოფლიო ჩემპიონატზე, გადაცემა დე ზურდაში, რომლის წამყვანიც თავად მარადონა იყო. "ჩვენ ერთმანეთს ძალიან თბილად ჩავეხუტეთ. დიეგომ გაიცინა და მითხრა: "შენ იცი, რამდენს იწონის თასი, მაგრამ მე ვიცი, რამდენს იწონის თასი ჩემთან ერთად".
არგენტინის ნაკრებმა 1986 წლის მსოფლიო ჩემპიონატის ფინალში გერმანიას 3:2 მოუგო - გოლები ბრაუნმა, ვალდანომ და ბურუჩაგამ შეაგდეს, გერმანელთაგან კი თავი რუმენიგემ და ფიოლერმა გამოიჩინეს. მაშინ, ალბისელესტემ პლანეტის საუკეთესო ნაკრების წოდება მეორედ მოიპოვა.
