გასხვისებაში მონაწილეობდნენ და განვითარების გეგმას შეიმუშავებენ - Sports Orient-ის როლი დინამო ბათუმის ამბებში

დინამო ბათუმის გასხვისების პროცესი დასრულდა და კლუბი ოფიციალურად, მის ახალ მესაკუთრეს, სააქციო საზოგადოება დ.ბ 1923-ს გადაეცა.

გარიგებაში მონაწილეობა Sports Orient-ის გუნდმა მიიღო, რომელმაც პროექტზე საწყისი ეტაპიდან იმუშავა, ამიერიდან კი კლუბში არსებულ მდგომარეობას დეტალურად შეისწავლის და შემდეგ მისი მდგრადი განვითარების სტრატეგიას შეიმუშავებს.

"მიგვაჩნია, რომ ბათუმის დინამოში სააქციო საზოგადოება დ.ბ 1923-ის, მისი დამფუძნებელისა და მთავარი აქციონერის, ბიზნესმენ თემურ მიქელაძის შესვლა და ინვესტირება ამ ეკოსისტემას კიდევ უფრო გააძლიერებს და საკლუბო ფეხბურთში მართვის ახალ სტანდარტს დააწესებს.

მსგავსი მასშტაბის ტრანზიცია საკლუბო ფეხბურთის გაძლიერებასთან ერთად, ბიზნესს ფეხბურთით და სპორტით დაინტერესებას კიდევ უფრო დიდ იმპულსს მისცემს.

ვულოცავთ დინამო ბათუმს, მის გულშემატკივარს და ყველა დაინტერესებულ მხარეს ამ შეთანხმების წარმატებით დასრულებას", - ავრცელებს განცხადებას Sports Orient-ის დამფუძნებელი, ოთარ მუმლაძე.