გათიშული ტრანსლაცია ოქროს ბურთზე: რა გააკეთა რეალის არხმა კეინის ტრიუმფის შემდეგ

2026 წლის ოქროს ბურთის დაჯილდოებაზე მადრიდის რეალის ოფიციალურმა ტელევიზიამ დიდი მითქმა-მოთქმა გამოიწვია. 

მას შემდეგ, რაც გაირკვა, რომ წლის მთავარი ინდივიდუალური ჯილდო სამეფო კლუბის ვარსკვლავის, კილიან მბაპეს ნაცვლად ინგლისელმა ჰარი კეინმა მოიპოვა, არხმა ლონდონის პალადიუმიდან პირდაპირი ტრანსლაცია მყისიერად შეწყვიტა.

ესპანური გამოცემა Sport-ის ინფორმაციით, ბაიერნის ფორვარდის გამარჯვებულად გამოცხადებისთანავე ეკრანზე გაჩნდა შეტყობინება, რომ მაუწყებლობა საავტორო უფლებებთან დაკავშირებული მიზეზების გამო მიუწვდომელი იყო. ამ გადაწყვეტილების ზუსტმა დრომ გულშემატკივრებში და მედიაში ბევრი კითხვა გააჩინა. ჰარი კეინმა ჯილდო ფენომენალური სეზონის შემდეგ დაიმსახურა - მან 65 მატჩში 73 გოლი გაიტანა (მათ შორის 61 უშუალოდ ბაიერნის მაისურით), რითაც კონკურენტებს დიდი უპირატესობით აჯობა.

კილიან მბაპე გამოკითხვაში მეორე ადგილზე გავიდა. მიუხედავად იმისა, რომ ფრანგს წინა სეზონში საკლუბო ტიტულები არ მოუგია და არც გოლების რაოდენობით ყოფილა საუკეთესო, ნაწილი მას მაინც მთავარ ფავორიტად მიიჩნევდა. 

დაჯილდოებაზე კიდევ ერთი მნიშვნელოვანი პრიზი ესპანელმა ლამინ იამალმა მიიღო, რომელიც ზედიზედ მესამედ გახდა საუკეთესო ახალგაზრდა მოთამაშე. აღსანიშნავია, რომ მადრიდის რეალის ტელევიზია კლუბის პოზიციების გამოსახატავად ერთ-ერთი მთავარი პლატფორმაა. ბოლო პერიოდში ეს არხი მსაჯების კრიტიკითა და მათზე შესაძლო ზეწოლის მომხდენი ვიდეოებითაც მოექცა ყურადღების ცენტრში, რასაც სხვა გუნდების პროტესტი მოჰყვა,თუმცა რეალის წინააღმდეგ სანქციები არ გატარებულა.