საფრანგეთის ნაკრების ნახევარმცველმა, ადრიენ რაბიომ კატეგორიულად უარყო ხმები იმის შესახებ, რომ ფრანგები მსოფლიო ჩემპიონატის ნახევარფინალის წინ ესპანელი გარემარბის, ლამინ იამალის გასანეიტრალებლად განსაკუთრებულ ტაქტიკას ამზადებენ.
მან ასევე ისაუბრა ბარსელონას ტალანტის მიმართ წარსულში გამოთქმულ კრიტიკაზე, რაც ევრო 2024-ზე მის საწინააღმდეგოდვე შემობრუნდა.
ევროპის ჩემპიონატის ნახევარფინალის წინ რაბიომ განაცხადა, რომ იამალს ფინალში სათამაშოდ „ბევრად მეტის გაკეთება“ მოუწევდა, რაზეც ესპანელმა მოედანზევე უპასუხა, ფრანგებს საოცარი გოლი გაუტანა, ნაკრები ტურნირიდან გამოაგდო, სოციალურ ქსელში კი დაწერა: „იმოძრავე ჩუმად და ილაპარაკე მხოლოდ მაშინ, როცა შახმატს აცხადებ“.
დალასში გასამართი მუნდიალის ნახევარფინალის წინ რაბიომ ძველი დაპირისპირება გააცოცხლა:
იამალის წინააღმდეგ სპეციალური გეგმა არ არსებობს. ჩვენ ესპანეთის ნაკრებზე ვფოკუსირდებით და არა მხოლოდ ერთ მოთამაშეზე. ვიცით, რამდენად სახიფათოები არიან ისინი მთლიანობაში, როგორ პოულობენ სივრცეებს საჯარიმოსთან. ასე რომ, მხოლოდ ერთ ფეხბურთელზე კონცენტრირება შეცდომა იქნებოდა
წარსულში გაკეთებულ განცხადებაზე კი ფრანგმა მოკლედ უპასუხა:
ზუსტად არ მახსოვს, რა ვთქვი, მაგრამ თუ ვთქვი, ესე იგი იმ მომენტში ასე ვფიქრობდი
