გიორგი სარდალაშვილი ევროპის ჩემპიონია!

ძიუდოში ევროპის ჩემპიონატი დაიწყო, რომლის პირველ დღესაც გიორგი სარდალაშვილმა (-60 კგ) ოქროს მედალი მოიპოვა.

ქართველმა ასპარეზობა 1/8 ფინალში დაიწყო და უნგრელ მარტონ ანდრასის ვაზარით მოუგო. 1/4 ფინალში გიორგიმ სომეხ აშინ ანდრეიანს სძლია იპონით და 1/2 ფინალში გავიდა, სადაც მისი მეტოქე ფრანსისკო გარიგოსი იყო.

ფინალის საგზურისთვის ბრძოლაში სარდალაშვილმა ესპანელ მეტოქეს შიდოებით მოუგო და ევროპის ჩემპიონატის მედალი გაინაღდა.

ფინალურ დაპირისპირებაში ქართველის მოწინააღმდეგე ნეიტრალური დროშის ქვეშ მოასპარეზე რუსი აიუბ ბლიევი იყო, რომელსაც იუკოთი სძლია.

2024 წელს მსოფლიო ჩემპიონობის შემდეგ, გიორგი სარდალაშვილი 21 წლის ასაკში უკვე ევროპის ჩემპიონიც არის.

დღეს ნაადრევ ეტაპზე ასპარეზობას გამოეთიშნენ ჯულიეტა როდონაია (-48 კგ), ვაჟა მარგველაშვილი (-66 კგ) და თემურ ნოზაძე (-66 კგ).