საქართველოს ეროვნული ნაკრების მთავარმა მწვრთნელმა ვილი სანიოლმა ჩრდილოეთ ირლანდიასთან მარცხის შემდეგ პრესკონფერენციაზე ისაუბრა.
„ჩემი აზრით, მატჩზე სწორი გეგმით გავედით. პირველ ტაიმში არასაკმარისად ინტენსიურები ვიყავით. წინა კვირას რომ ვთქვი, რომ ბევრი ფეხბურთელი გვყავს ფორმიდან ამოვარდნილი, რომლებსაც 35-40 წუთზე მეტის თამაში არ შეუძლით, მართალი აღმოვჩნდი.
ყველაზე დიდ პრობლემას ის ქმნის, რომ ეს ფეხბურთელები ჩვენთვის მნიშვნელოვანი მოთამაშეები არიან. კიტე და ჩაკვე როცა ფორმაში არიან, სულ თამაშობენ, მაგრამ ამჟამად მათ მხოლოდ იმდენის თამაში შეუძლიათ, რამდენიც დღეს ითამაშეთ და ესაა პრობლემა. ჩაკვესნაირი პროფილის ფეხბურთელი არ გვყავს და გადაწყობა გვიწევს, რაც მარტივი არაა.
დღევანდელ მატჩზე რომ გადავიდე - პირველი ტაიმი შედარებით სუსტი იყო, მეორე უკეთესი. მიქაუტაძეს ჰქონდა 2-3 კარგი მომენტი, კვარამ კი პენალტი ვერ გამოიყენა და რომ დავაჯამო, 4-5 კარგი შანსი გვქონდა. არ ვამბობ, რომ მეტოქე გამარჯვებას არ იმსახურებდა, თუმცა ვფიქრობ, რომ ჩვენც უკეთესი შედეგი გვეკუთვნოდა კიდეც, ბურთი კარში რომ შესულიყო.
ფეხბურთელების წყობილებიდან გამომდინარე ისეთი გადაწყვეტილების მიღება მიწევს, რომელსაც, როგორც წესი, არ მივიღებდი. ამ მომენტისთვის არც ისე ბევრი ვარიანტი გვაქვს. პირველი ტაიმი სუსტი იყო, ინტენსივობა დაგვაკლდა. შეტევებს ნელა ვიწყებდით, ზოგჯერ კვარას უწევდა დაბლა დახევა და მიქაუტაძე და კვერნაძე კი შერბენებით საჯარიმოში ვერ შედიოდნენ.
რაც შეეხება პენალტის შემსრულებელს - კვარას და მიქაუტაძეს, ბოლო 4 წელია ასე ვმუშაობთ და მომენტში ურტყამს ის, ვინც თავს უკეთ გრძნობს, რაც ჩემთვის არანაირ პრობლემას არ წარმოადგენს. ჟორჟსაც გაუფუჭებია პენალტები და თუ არ დაარტყამ, პენალტს ვერც გააფუჭებ. ასე რომ, კვარაზე სათქმელი არაფერია, ხდება ხოლმე.
რომ გაგვეტანა, ახლა ყველაფერი განსხვავებულად იქნებოდა. თუმცა, როცა სამ ცენტრალურ მცველს მოედნის დისკომფორტის გამო დატოვება უწევს, ვერაფერს შეცვლი." - აღნიშნა სანიოლმა.
