WBF-ის ეგიდით, საქართველოს კიდევ ერთი მსოფლიო ჩემპიონი ჰყავს - 72 კგ. წონით კატეგორიაში მოასპარეზე გივი თოდუა! 20 წლის ქართველმა წონის ერთ-ერთი უძლიერესი მოკრივე, ტაილანდელი ფიმირ ჩონკუნი, დაამარცხა.
თოდუა თითქმის მთელი ბრძოლის განმავლობაში აქტიური იყო და ბევრს უტევდა, საბოლოოდ, ჩონკუნმა 7 რაუნდის შემდეგ ბრძოლის გაგრძელებაზე უარი განაცხადა და მსოფლიო ჩემპიონის ქამარი ქართველ მოკრივეს გადაეცა.
ბრძოლის დასრულების შემდეგ, ახალგაზრდა ქართველმა მსოფლიო ჩემპიონმა ემოციები adjarabet arena-ს გაუზიარა:
"ბავშვობიდან ვშრომობ იმისთვის, რაც დღეს ამ რინგზე წარმოვაჩინე და მსოფლიო ჩემპიონი დამსახურებულად გავხდი! ძალიან ბედნიერი ვარ, სიტყვების პოვნაც მიჭირს... მომავალში უფრო მეტს მოვინდომებ და შევეცდები, სხვა ვერსიის ქამრებიც მოვიპოვო.
ძალიან ძლიერი მეტოქე მყავდა და ჩემგან მას დიდი პატივისცემა. ჩემთვის კარიერაში პირველი 12-რაუნდიანი ბრძოლა იყო და ვცდილობდი, ძალები გადამენაწილებინა - მე-7 რაუნდისთვის ჩემი მაქსიმუმი ჯერ კიდევ არ მქონდა ნაჩვენები და მომატებას ვაპირებდი, მაგრამ ამის შესაძლებლობა აღარ მომეცა. საერთო ჯამში, ვფიქრობ, ბრძოლა კარგად ჩავატარე და საკუთარი თავით კმაყოფილი ვარ".
გივი თოდუა, ევროპის მასშტაბით, ერთ-ერთ ყველაზე გამორჩეულ და პერსპექტიულ მოკრივედ ითვლება - ეს მისთვის პირველი მსოფლიო ჩემპიონობაა. პროფესიონალურ კრივში 2023 წლიდან ჩაერთო - დღემდე გამართული 9 ბრძოლიდან 6 მოიგო და 3-ჯერ დამარცხდა.
