ლაშა გურული კრივის მსოფლიო ჩემპიონატის ნახევარფინალურ ბრძოლას ტრავმის გამო ჩაეხსნა.
"დავიწყებ მადლობით! პირველ რიგში მადლობა უფალს ყველაფრისთვის, რაც ხდება ჩემს ცხოვრებაში. მადლობა ჩემს ოჯახს, მადლობა ჩემს გულშემატკივარს, რადგან წლების განმავლობაში ვხედავ და ვგრძნობ უამრავ სითბოს, დაფასებასა და სიყვარულს !
რაც შეეხება მსოფლიო ჩემპიონატს, იცით რომ ნახევარფინალში ვარ, რაც იმას ნიშნავს, რომ გავინაღდე ბრინჯაოს მედალი. თუმცა სამედიცინო კვლევის, ექიმისა და გუნდის გადაწყვეტილებით, მსოფლიო ჩემპიონატის ნახევარფინალურ ბრძოლაში სამწუხაროდ ვერ მივიღებ მონაწილეობას, რადგან ტრავმირებული ხელით მომიწია სამივე ბრძოლის ჩატარება!
ბუნებრივია ბრძოლიდან ბრძოლამდე იმ მდგომარეობამდე მივიდა, რომ შეუძლებელი გახდა ჩემპიონატის გაგრძელება!
6 წლის განმავლობაში მსოფლიო და ევროპის ჩემპიონატებიდან, ოლიმპიური თამაშებიდან მედლის გარეშე არ დავბრუნებულვარ.
ენით აღუწერელი სიხარული და სიამაყეა, როდესაც კვარცხლბეკზე დგომისას ქართულ დროშას ვუყურებ, კიდევ ერთხელ ვგრძნობ რამდენად ბევრს ნიშნავს ჩვენი დროშა და ჩვენი სამშობლო.
თუმცა, ამჯერად მიზანშეწონილია გავივიარო სრული რეაბილიტაცია, რადგან დაგიბრუნდეთ ბევრად ძლიერი. წინ დიდი გზა გვაქვს. პროფესიონალური კარიერა და მომავალი ოლიმპიური თამაშები 2028! " - წერს გურული სოციალურ ქსელში.
ქართველმა მოკრივემ მსოფლიო ჩემპიონატებზე მესამე ბრინჯაოს მედალი მოიპოვა (2021, 2023, 2025).
