ზიმბაბველმა მებრძოლმა თემბა გორიმბომ შერეულ ორთაბრძოლებში თავისი 16-წლიანი კარიერა დაასრულა. UFC-ის ქვესაშუალო წონის სპორტსმენმა გადაწყვეტილება მას შემდეგ მიიღო, რაც ზედიზედ სამი მარცხი განიცადა და ორგანიზაციაში გამოსვლა 4 მოგებითა და 4 წაგებით დაასრულა.
გორიმბო მსოფლიომ მას შემდეგ გაიცნო, რაც 2020 წელს ტაკაში სატოსთან ბრძოლის წინ აღიარა, რომ საბანკო ანგარიშზე მხოლოდ 7.49 დოლარი ჰქონდა. მისმა მძიმე სოციალურმა ისტორიამ ჰოლივუდის სუპერვარსკვლავის, დუეინ როკ ჯონსონის ყურადღება მიიპყრო, რომელმაც სპორტსმენს ამერიკაში საკუთარი სახლი უყიდა და მისი ცხოვრება რადიკალურად შეცვალა.
გორიმბომ სოციალურ ქსელში ვრცელი გამოსამშვიდობებელი პოსტი გამოაქვეყნა, სადაც UFC-ის ხელმძღვანელობას შანსისთვის, ხოლო დუეინ ჯონსონს განსაკუთრებული მხარდაჭერისთვის მადლობა გადაუხადა:
35 წლის ასაკში ერთი თავი სრულდება და ახალი იწყება. გულწრფელად რომ გითხრათ, შვებას ვგრძნობ. არაფერს ვნანობ. მადლობა ჩემს მეგობარ დუეინ ჯონსონს და მის გუნდს ყველაფრისთვის. ჩემი ამერიკული ოცნება თქვენ გარეშე ნამდვილად არ ახდებოდა. მე არ დავნებებულვარ, უბრალოდ ეს ეტაპი დასრულდა.
მიუხედავად იმისა, რომ თემბა გორიმბომ თავის მთავარ სპორტულ მიზანს - გამხდარიყო UFC-ის ჩემპიონი - ვერ მიაღწია, ის შერეული ორთაბრძოლების სრულიად დატოვებას არ აპირებს. ზიმბაბველი სპორტსმენი გეგმავს, რომ მომავალში მუშაობა მწვრთნელისა და მენეჯერის ამპლუაში გააგრძელოს.
გარდა ამისა, გორიმბო აღნიშნავს, რომ ახლა მთელ ენერგიას საკუთარ შვილებს დაუთმობს, რათა მათ სხვა სპორტში დაეხმაროს წარმატების მიღწევაში:
ჩხუბი ჩემი ნიჭის მხოლოდ მცირე ნაწილი იყო. ახლა დროა, მთელი ყურადღება ჩემი ქალიშვილების ჩოგბურთის კარიერაზე გადავიტანო.
