არსენალს სატრანსფერო პოლიტიკის შეცდომების გამო უამრავი პოტენციური ვარსკვლავი დაუკარგავს.
ამის ერთ-ერთი ყველაზე ნათელი მაგალითი ხვიჩა კვარაცხელიაა. სანამ ქართველი ფეხბურთელი ნაპოლიში მსოფლიო დონის ვარსკვლავი გახდებოდა და ოქროს ბურთის კანდიდატად მოიხსენიებდნენ, ის არსენალის სკაუტების ყურადღების ცენტრში იყო.
კლუბის შიდა განხილვების შემდეგ ჩათვალეს, რომ ამ რისკზე წასვლა არ ღირდა და ედუ გასპარმა კვარაცხელიას ნაცვლად მარკინიოსი დაიმატა. ეს გადაწყვეტილება დღემდე მტკივნეულია გულშემატკივრებისთვის, რადგან ახლა ხვიჩა მსოფლიოს ერთ-ერთი საუკეთესო ვინგერია.
მედიის შეფასებით, ანდრეა ბერტამ ზუსტად მსგავსი შეცდომა მიქა გოდტსის ტრანსფერზეც დაუშვა. აპრილში არსენალის სკაუტები ნაკ ბრედასთან მატჩზე აკვირდებოდნენ ბელგიელ შემტევს, სადაც მან შესანიშნავად ითამაშა, გოლი გაიტანა და საგოლე გადაცემაც მიითვალა.
გოდტსმა გასული სეზონი ჰოლანდიურ ლიგაში 17 გატანილი ბურთითა და 15 საგოლე გადაცემით დაასრულა და ჩემპიონატის ერთ-ერთი საუკეთესო მოთამაშე გახდა. მიუხედავად იმისა, რომ არსენალს მისი დამატება რეალურად შეეძლო, გარიგება ვერ შედგა.
საბოლოოდ, 21 წლის ნიჭიერი ფეხბურთელი ევროპის ჩემპიონ პარი სენ-ჟერმენში 55 მილიონი ევროს სანაცვლოდ გადავიდა. ლუის ენრიკეს ხელმძღვანელობით გოდტსი პსჟ-ში დიდ ვარსკვლავად ჩამოყალიბების გზას ადგას, არსენალი კი, კვარაცხელიას მსგავსად, კიდევ ერთ ტალანტს კარგავს.
ტალანტი ბელგიიდან - ვინ არის პარი სენ-ჟერმენის ახალწვეული?
