გრემ პოტერის კომენტარი მატჩის შემდეგ

შვედეთის ნაკრების მთავარი მწვრთნელი, გრემ პოტერი, აღფრთოვანებული იყო მას შემდეგ, რაც მისმა გუნდმა მსოფლიო ჩემპიონატის კამპანია ორშაბათს საღამოს, ესტადიო მონტერეიზე, ტუნისის 5-1 განადგურებით დაიწყო.

ისინი სრულიად განსხვავდებოდნენ იმ გუნდისგან, რომელიც საკვალიფიკაციო ეტაპზე სუსტად ასპარეზობდა. შვედებმა შეცდომებით აღსავსე ტუნისს დამაჯერებელი თამაშით მოუგეს. მატჩის პირველი და ბოლო გოლები ბრაიტონის ნახევარმცველმა, იასინ აიარიმ გაიტანა, თავი გამოიჩინა მატიას სვანბერგმაც, ვარსკვლავურმა დუეტმა - ალექსანდერ ისაკმა და ვიქტორ გიოკერეშმა ასევე შეძლეს მეტოქის კარის აღება.

პოტერი მატჩის შემდეგ ძალიან გახარებული იყო, თუმცა, როგორც ჩანს, თამაშის მსვლელობისას დაზიანება მიიღო. ფოტოებზე ჩანდა, რომ მას მარჯვენა ყურიდან სისხლი მოსდიოდა.

„არ ვიცი, რა მოხდა. ვიღაცამ დამკაწრა ან მიკბინა. ვიდეოჩანაწერს უნდა ვუყურო და გავაანალიზო“, – იხუმრა მან შვედურ გამოცემა Sportbladet-თან საუბრისას.

პოტერმა განაცხადა:

ძალიან კმაყოფილი ვარ ფეხბურთელებით. ჩვენ ვიცით წინა ხაზზე მყოფი მოთამაშეების ინდივიდუალური ხარისხი, მაგრამ მათ სჭირდებოდათ, რომ გუნდს ერთიანად ემუშავა. იდეალურები არ ვყოფილვართ, თუმცა, ვფიქრობ, მატჩის დასაწყისში თამაშს კარგად ვაკონტროლებდით.

ჩვენ მხოლოდ იმაზე ვფოკუსირდებით, რაც ჩვენს ხელთაა, ჩვენს საკუთარ თამაშზე. არ აქვს მნიშვნელობა, რას ფიქრობენ გარედან ან რა მოსაზრებები აქვთ.

შვედეთს საკმაოდ რთულ F ჯგუფში კიდევ ელის შეხვედრები იაპონიასა და ნიდერლანდებთან, რომლებმაც კვირას მატჩი ფრედ, 2-2 დაასრულეს.

მონტერეიში ნაჩვენებმა თამაშმა შვედ გულშემატკივრებს იმედები გაუცოცხლა მას შემდეგ, რაც გუნდს საშინელი საკვალიფიკაციო ეტაპი ჰქონდა – მათ თავიანთ ჯგუფში ვერცერთი თამაშის მოგება ვერ შეძლეს, რის გამოც მდგომარეობის გამოსასწორებლად პოტერი მთავარ მწვრთნელად გვიან დანიშნეს.

საბოლოოდ, მათ ფინალურ ეტაპზე გასვლა ერთა ლიგის პლეი-ოფის წყალობით მოახერხეს, სადაც უკრაინა და პოლონეთი დაამარცხეს და ასე მოხვდნენ ამ ზაფხულის ტურნირზე, რომელიც აშშ-ში, კანადასა და მექსიკაში ტარდება.