სეზონის მე-2 გრენდ სლემის, როლან გაროსის მეორე წრეში იანიკ სინერი ტურნირს მოულოდნელად გამოეთიშა.
მთავარი ფავორიტისა და რეიტინგის უპირობო ლიდერის მეტოქე არგენტინელი ხუან მანუელ სერუნდოლო იყო, რომელსაც სინერმა პირველი ორი სეტი 6:3 6:2 მარტივად მოუგო და მესამესაც 5:1-ს უგებდა, რა დროსაც ჯანმრთელობის პრობლემები დაეწყო და ზედიზედ 6 გეიმთან ერთად, მესამე სეტიც 5:7 დათმო.
ბოლო ორ სეტში კი ბრძოლა აღარ გამოვიდა - იანიკმა კორტზე ექიმებსაც უხმო, თუმცა ვერაფერმა უშველა და ორივე სეტი სინერმა ერთნაირი ანგარიშით 1:6 წააგო.
საბოლოოდ 3:6 2:6 7:5 6:1 6:1 3 საათსა და 31 წუთში და სერუნდოლო მესამე წრეში მიდის, სინერი კი, რომელსაც შარშანდელი ფინალი ჰქონდა დასამტკიცებელი, სახლში ნაადრევად მიემგზავრება.
იმის გათვალისწინებით, რომ ალკარასი ამ ტურნირზე მონაწილეობას ტრავმის გამო ვერ მიიღებს, შანსი ეძლევა ნოვაკ ჯოკოვიჩს, ალექსანდრ ზვერევს ან სხვა რომელიმე ტოპ-ჩოგბურთელს.
შეგახსენებთ, რომ ბოლო ორი სეზონის განმავლობაში სინერი და ალკარასი სტაბილურად იგებდნენ 2-2 გრენდ სლემს. ეს კანონზომიერება წლევანდელ ავსტრალიაზეც გაგრძელდა, რომელიც ესპანელმა მოიგო. თუმცა, ამ ტურნირზე ეს ტენდეცია შეწყდება.
აქვე იმასაც გეტყვით, რომ ამ მატჩამდე სინერს 30-მატჩიანი წაუგებელი სერია ჰქონდა, რომლის განმავლობაშიც იტალიელმა აქამდე ყველა ჩატარებული მასტერსი მოიგო (ინდიან უელსი, მაიამი, მონტე-კარლო, მადრიდი, რომი), რის გამოც კიდევ უფრო დიდ ფავორიტად ითვლებოდა.
როლან გაროსი ერთადერთ გრენდ სლემად რჩება, რომელიც სინერს არასდროს მოუგია.
