გულდასაწყვეტი ისტორია უიმბლდონზე - დიმიტროვი სინერს უგებდა, თუმცა თამაში ვეღარ გააგრძელა

მოულოდნელად დატრიალდა მოვლენები უიმბლდონის კაცთა თანრიგის 1/8 ფინალში.

რაუნდის ბოლო შეხვედრაში, ცენტრალურ კორტზე მსოფლიო რეიტინგის ლიდერი იანიკ სინერი ბულგარელ გრიგორ დიმიტროვს ეთამაშებოდა.

34 წლის ჩოგბურთელი ძალიან კარგად გამოიყურებოდა და სინერს პირველ ორ სეტში პრაქტიკულად შანსი არ დაუტოვა - 6:3 7:5 და უიმბლდონის კორტზე სენსაციის შეგრძნება უფრო და უფრო იმატებდა.

მესამე სეტში ჩოგბურთელები საკუთარ მოწოდებებს დამაჯერებლად იგებდნენ. 2:2-ზე დიმიტროვმა ჩაწოდებისას მხარში ტკივილი იგრძნო და კორტზე ექიმის გამოძახებაც დასჭირდა.

სამწუხაროდ, მისი დაზიანება ზედმეტად მძიმე გამოდგა იმისთვის, რომ თამაში გაეგრძელებინა და ბულგარელს სეტებში 2:0-ს მიუხედავად მატჩიდან ჩახსნა მოუწია.

მეტოქის ტრავმის ხარჯზე გამარჯვება სინერს ჩაეწერა, რომელიც 1/4 ფინალში გავიდა, სადაც ამერიკელ ბენ შელტონს დაუპირისპირდება.