ანტუან სემენიოს 72 მილიონ ევროდ შეძენის შემდეგ, პეპ გვარდიოლას ხელმძღვანელობის პერიოდში მანჩესტერ სიტის ტრანსფერებზე დახარჯულმა თანხამ 2 მილიარდ ევროს გადააჭარბა.
2016 წლის ზაფხულიდან, როცა გვარდიოლამ მანჩესტერ სიტი ჩაიბარა, არცერთ სხვა მწვრთნელს ტრანსფერებზე ამხელა თანხა არ დაუხარჯავს. მეორე ადგილზეა დიეგო სიმეონე — ატლეტიკომ მისი მუშაობის პერიოდში 1,22 მილიარდი ევრო დახარჯა. მესამე ანტონიო კონტეა — 1,19 მილიარდი.
ამ დროის განმავლობაში მხოლოდ სამი მწვრთნელის ხელმძღვანელობით დაიხარჯა ერთ კონკრეტულ კლუბში მილიარდ ევროზე მეტი: გვარდიოლა (მანჩესტერ სიტი), სიმეონე (ატლეტიკო) და მიკელ არტეტა (არსენალი).
მთელი სამწვრთნელო კარიერის განმავლობაში გვარდიოლას კლუბებმა ტრანსფერებზე ჯამში 2,58 მილიარდი ევრო დახარჯეს — ეს ყველაზე მაღალი მაჩვენებელია ისტორიაში. შემდეგ მოდიან ჟოზე მოურინიო (1,99 მილიარდი), კარლო ანჩელოტი (1,8 მილიარდი), მასიმილიანო ალეგრი (1,6 მილიარდი) და დიეგო სიმეონე (1,55 მილიარდი).
