პრემიერ ლიგის საჩემპიონო რბოლა პიკს აღწევს.
მას შემდეგ, რაც არსენალმა ვესტ ჰემთან VAR-ის საკამათო გადაწყვეტილებით მოიგო და ლიდერობა გაიმყარა, მთელი ყურადღება მანჩესტერ სიტის მთავარი მწვრთნელისკენ, პეპ გვარდიოლასკენ იყო მიპყრობილი.
„დაივიწყეთ ის, რასაც ვერ აკონტროლებთ“
მიუხედავად იმისა, რომ არსენალს გაუქმებულმა გოლმა 79 ქულა და 5-ქულიანი უპირატესობა მოუტანა, გვარდიოლა პროვოკაციას არ წამოეგო. პრესკონფერენციაზე პეპმა მკაფიოდ დააფიქსირა, რომ სხვის მატჩებზე ნერვიულობას არ აპირებს.
„კრისტალ პალასი - მხოლოდ იმაზე ვფიქრობ, რა უნდა გავაკეთოთ ჩვენ. ჩემი კარიერის განმავლობაში ვისწავლე: ის, რასაც ვერ აკონტროლებ, უბრალოდ დაივიწყე. ჩვენ უნდა გამოვასწოროთ ის, რაც ამ სეზონში კარგად ვერ გავაკეთეთ. ბრძოლას ვაგრძელებთ და შემდეგი მეტოქე პალასია,“ - განაცხადა გვარდიოლამ.
როტაციის შიში და პალასის ფაქტორი
ვითარებას ართულებს ისიც, რომ კრისტალ პალასი კონფერენს ლიგის ფინალისთვის ემზადება, რის გამოც გუნდის მწვრთნელმა, ოლივერ გლასნერმა, სიტისთან მატჩში როტაცია დააანონსა. ამან ბევრს გაუჩინა ეჭვი, რომ ლონდონელები სათანადო წინააღმდეგობას ვერ გაწევენ, თუმცა გვარდიოლა მეტოქეს აფასებს: „ისინი პროფესიონალები არიან და ჩვენს წინააღმდეგ უმაღლეს დონეზე ითამაშებენ“.
სატურნირო მდგომარეობა: 36 ტურის შემდეგ
ამ დროისთვის პრემიერ ლიგის სათავეში არსენალია 79 ქულით (36 მატჩი), სიტის კი 74 ქულა აქვს, თუმცა ერთი გამოტოვებული თამაში რეზერვშია. თუ გვარდიოლას გუნდი პალასთან ქულებს დაკარგავს, არტეტას გუნდი ტიტულთან ისტორიულად ახლოს აღმოჩნდება.
