ბრაზილიის ეროვნულმა ნაკრებმა მსოფლიო ჩემპიონატის C ჯგუფის მეორე ტურში ჰაიტი ანგარიშით 3-0 გაანადგურა.
ფილადელფიის სტადიონზე განცდილი ამ მარცხის შემდეგ, კარიბის ზღვის აუზის გუნდი გახდა პირველი ნაკრები, რომელიც 2026 წლის მუნდიალს ოფიციალურად გამოეთიშა. კარლო ანჩელოტის გუნდმა კი მაროკოსთან ნაჩვენები არადამაჯერებელი თამაშის შემდეგ რეაბილიტაცია შეძლო და ჯგუფში პირველ ადგილზე გადავიდა.
მატჩის მთავარი გმირი მანჩესტერ იუნაიტედის თავდამსხმელი მათეუს კუნია გახდა, რომელმაც დუბლი შეასრულა. პირველ გოლში მას იღბალმაც შეუწყო ხელი, როცა ვინისიუს ჟუნიორის დარტყმული ჰაიტის კაპიტანმა, ჯონი პლასიდმა მოიგერია, კუნიამ კი დამატებაზე ზუსტად ითამაშა. 36-ე წუთზე კუნიამ უძლიერესი დარტყმით ცხრიანში გაიტანა და ანგარიში ორამდე გაზარდა.
მალევე, თავად ვინისიუს ჟუნიორმა ლუკას პაკეტას ბრწყინვალე გადაცემა გამოიყენა, მეკარე მოატყუა და მატჩის საბოლოო ანგარიში, 3:0 დააფიქსირა. მეორე ტაიმში მოედანზე გულშემატკივრებისთვის დიდხანს ნანატრი მადრიდის რეალის ტალანტი, ენდრიკიც გამოჩნდა.
მიუხედავად დამაჯერებელი გამარჯვებისა, ბრაზილიელებისთვის საღამო იდეალური არ ყოფილა. პირველი ტაიმის მიწურულს ბარსელონას შემტევმა, რაფინიამ ბარძაყის კუნთის ტრავმა მიიღო, რის გამოც მოედანი ნაადრევად დატოვა და ის ბორნმუთის ახალგაზრდა ვინგერით, რაიანით ჩაანაცვლეს.
ანჩელოტისთვის ეს სერიოზული დანაკლისია, მით უმეტეს, რომ მომდევნო ოთხშაბათს ბრაზილიას ჯგუფური ეტაპის ბოლო და გადამწყვეტი მატჩი ელის შოტლანდიასთან. ამ დროისთვის C ჯგუფს 4-4 ქულით ბრაზილია და მაროკო (რომელმაც შოტლანდიას 1:0 მოუგო) ლიდერობენ, ხოლო შოტლანდიელები 3 ქულით მესამე ადგილზე იმყოფებიან, რაც ბოლო ტურის წინ დიდ ინტრიგას ტოვებს.
