23 წლის კარლოს ალკარასისთვის, რომელიც მსოფლიო რეიტინგში მე-3 ადგილს იკავებს, გვირაბის ბოლოს სინათლე გამოჩნდა.
138-დღიანი უქმობის შემდეგ, დიდი სლემის ტურნირების 7-გზის ჩემპიონი მარჯვენა მაჯის ტრავმისგან გამოჯანმრთელდა და აშშ-ის ღია პირველობაზე ითამაშებს.
დაზიანება მან 14 აპრილს, Barcelona Open-ის პირველ წრეში, ოტო ვირტანენთან მატჩის დროს მიიღო.
ალკარასის თავდაპირველი მიზანი 13 აგვისტოს, ცინცინატის მასტერსზე დაბრუნება იყო, თუმცა მან ესპანეთში დარჩენა და ვარჯიშის გაგრძელება გადაწყვიტა. ამერიკაში გამგზავრება ნაადრევი იქნებოდა, რადგან ბურთზე დარტყმას ჯერ კიდევ სრული თავისუფლებით ვერ ახერხებდა.
ნამდვილი გამოცდა ამ კვირაში შედგა, როდესაც ჰოლგერ რუნესთან ვარჯიშებისას US Open-ის პირობების იმიტაცია მოახდინა. ზოგიერთი სავარჯიშო სესია 4 საათამდეც კი გრძელდებოდა.
ამ ხუთშაბათს კი საბოლოო ტესტი ჩატარდა, რომელმაც კარლიტოსი და მისი გუნდი დაარწმუნა, რომ ის ოფიციალურ შეჯიბრებებში დასაბრუნებლად მზადაა.
ალკარასი მომავალი კვირის დასაწყისში ნიუ იორკში ჩავა, სადაც სეზონის ბოლო დიდი სლემის სხვა მონაწილეებთან ერთად უმაღლეს დონეზე მოემზადება.
ესპანელი ჩოგბურთელი ამგვარად ტიტულისა და 2 000 სარეიტინგო ქულის დაცვის შესაძლებლობას მიიღებს. ტრავმის გამო უქმობის პერიოდში მან ჯამში 6 130 ქულის დაცვა ვერ მოახერხა.
მისი მთავარი მეტოქის, იანიკ სინერის US Open-ზე მონაწილეობა კი მუხლის ტრავმის გამო კვლავ კითხვის ნიშნის ქვეშაა.
კარლოს ალკარასმა კორტზე დაბრუნების ინფორმაცია გულშემატკივრებს ცნობილ სპორტულ ჟურნალისტ ფაბრიციო რომანოსთან კოლაბორაციით აცნო და ცნობილი ფრაზა დაწერა - HERE WE GO!
