"იბერია გვიტევდა, ბევრი სივრცე და შესაძლებლობა მივეცით" - ტურემ მატჩი შეაფასა

ჩემპიონთა ლიგის მე-2 საკვალიფიკაციო ეტაპის პირველ მატჩში, იბერია 1999-თან გასვლითი 2:0 გამარჯვების შემდეგ, სლოვან ბრატისლავას მთავარმა მწვრთნელმა, იაია ტურემ პრესკონფერენციაზე შეფასებები გააკეთა.

"პირველი ტაიმი საკმაოდ კარგად ჩავატარეთ და თამაშისადმი კარგი მიდგომა გვქონდა. მეორე ნახევარი გაცილებით რთული გამოვიდა, კონტროლიც შენარჩუნებას ვცდილობდით, მაგრამ იბერია გვიტევდა, მათ ბევრი სივრცე და შესაძლებლობა მივეცით. ბოლო 20 წუთი განსაკუთრებულად გვიჭირდა.

კმაყოფილი ვარ, რადგან ჩემმა ფეხბურთელებმა სწორი დამოკიდებულებით ითამაშეს, კარგი მენტალიტეტი გამოავლინეს და მოედანზე ბევრი იმუშავეს. ცხადია, გაუმჯობესება და უფრო მაღალ წერტილამდე ასვლა გვინდა, მაგრამ რაც დღეს გავაკეთეთ, უნდა დავაფასოთ.

რაც შეეხება ხელოვნურ თამაშგარეზე ჩვენს მუშაობასა და შედეგს, რაც მივიღეთ, VAR-ი სწორედ ამისთვისაა, რომ მსგავსი მომენტები ზუსტად და სამართლიანად შეფასდეს. ორი გოლი გავუშვით, მაგრამ არც ერთი ჩაითვალა და ორივე შემთხვევაში მცველებმა ფანტასტიკურად იმოქმედეს.

საერთოდ, დაცვის თამაშით კმაყოფილი ვარ, მეტოქის შეტევებთან გამკლავება იოლი არ ყოფილა. ჩემთვის სადებიუტო მატჩი იყო, გვაქვს მშრალი კარი და ბედნიერი ვარ, რომ სახლში ამ შედეგით მივდივართ", - აღნიშნა ტურემ.

43 წლის კოტ დ'ივუარელმა მწვრთნელობა 2021 წელს დაიწყო და ოლიმპიკ დონეცკში, ახმატ გროზნოში, სტანდარდ ლიეჟსა და საუდის არაბეთის ნაკრებში ასისტენტად მუშაობდა, ერთი სეზონით კი ტოტენჰემის ახალგაზრდული გუნდის მთავარი მწვრთნელი იყო, სლოვან ბრატისლავა კი ივნისის დასაწყისში ჩაიბარა (ვლადიმირ ვაისი ჩაანაცვლა).

თბილისში 2:0 გამარჯვების შემდეგ, სლოვანი იბერია 1999-ს ბრატისლავაში, 29 ივლისს უმასპინძლებს.

"ასეთი მსაჯობა გაუმართლებელია, პენალტი იყო" - რა თქვა დემჩენკომ