ილია თოფურია მსოფლიო ჩემპიონატის წინ საკუთარი ცხოვრების შესახებ ახალ რეალითი შოუში ისაუბრებს.
დოკუმენტური სერიალი, სახელწოდებით „The Topurias“, პლატფორმა HBO Max-ზე, ოქტაგონზე მის დაბრუნებამდე ერთი კვირით ადრე გამოდის. 14 ივნისს თეთრი სახლის ისტორიულ ტურნირზე ილია მსუბუქი წონის საჩემპიონო ქამარს ჯასტინ გეიჯის წინააღმდეგ დაიცავს. თოფურია თითქმის ერთი წელი არ გამოჩენილა პირადი პრობლემების გამო, რომლებსაც ფარდა სწორედ ამ სერიალში აეხდება.
გზა ორმაგ ჩემპიონობამდე
სერიალი სულ სამი ეპიზოდისგან შედგება და თითოეული 50 წუთს გაგრძელდება. მაყურებელი ნახავს ილიას გზას 2024 წლის ოქტომბერში ქვემსუბუქი წონის პირველი ტიტულის მოპოვებიდან, 2025 წლის ივნისში მსუბუქი წონის ჩემპიონობამდე. პროექტი დეტალურად ასახავს იმ უდიდეს მსხვერპლსა და დისციპლინას, რაც ორმაგ ჩემპიონობას დასჭირდა და ასევე იმ მიზეზებს, რის გამოც მას ტიტულის დაცვა აქამდე გადაედო.
ოჯახი და ბიზნესი კამერების მიღმა
სერიალი მაყურებელს სპორტსმენის ნაკლებად ცნობილ, პირად მხარეს დაანახებს. კამერები აჩვენებს, თუ როგორია ილია ოქტაგონს მიღმა - როგორც მამა, შვილი, ძმა, მეგობარი და ბიზნესმენი. შოუში მონაწილეობას მისი ოჯახის წევრები და მწვრთნელებიც იღებენ.
თოფურიას მსოფლიო პოპულარობა დღითიდღე იზრდება: ის ცოტა ხნის წინ ცნობილი ბრენდის, Richard Mille-ს სარეკლამო სახეც გახდა, ახლა კი ტელეეკრანებს იპყრობს. სერიალის მსოფლიო პრემიერა HBO Max-სა და TNT Sports-ზე უკვე დაიწყო.
