ინგლისი, ესპანეთი, საფრანგეთი, პორტუგალია - სად წავა აბუაშვილი?

ბრიტანული TEAMtalk გიორგი აბუაშვილის შესახებ საინტერესო ინფორმაციას ავრცელებს.

წყაროს ცნობით, ბრისტოლ სიტი ქართველი ვინგერის დამატებას ცდილობს, თუმცა მისი ხელმოწერისთვის სერიოზული კონკურენციაა გაჩაღებული.

22 წლის მარცხენა ვინგერი, რომელიც ახლა ფოთის კოლხეთში თამაშობს, ევროპის მასშტაბით რამდენიმე კლუბის ყურადღებას იქცევს. მისმა პერფორმანსებმა ინტერესი ესპანურ, ფრანგულ, პორტუგალიურ და ინგლისურ კლუბებში გამოიწვია.

აბუაშვილმა კოლხეთში 55 მატჩი ჩაატარა და 21 გოლთან ერთად 5 საგოლე გადაცემა მიითვალა. მას საქართველოს 21-წლამდე გუნდში 18 მატჩი აქვს ჩატარებული და მის ანგარიშზე 3 გოლია.

TEAMtalk-ის ცნობით, ერთ-ერთი პირველი კლუბი, რომელიც აბუაშვილით დაინტერესდა ბრისტოლ სიტი იყო, რომელიც მოთამაშესა და მის გარემოცვას გაზაფხულზე შეხვდა.

ინგლისური კლუბი მას სიტყვიერადაც შეუთანხმდა, თუმცა მოთამაშეს ჯერ საბოლოო გადაწყვეტილება არ მიუღია, ჩემპიონშიფის გუნდის ინტერესი კი კვლავ დიდია.

მოლაპარაკებების გაჭიანურებამ კარი გაუხსნა სხვა გუნდებს. ბრიტანული გამოცემის მიხედვით ესპანიოლი, ხეტაფე და ელჩე ბოლო კვირებში კონკრეტულ ინტერესს იჩენენ.

აბუაშვილი თავის მხრივ გადაწყვეტილების მიღებას არ ჩქარობს, მას სწორი პროექტის არჩევა სურს, რომელიც მას პროგრესში დაეხმარება და მისი კარიერის ახალ ეტაპზე გადაიყვანს ევროპის ერთ-ერთ ტოპ ლიგაში. ეს ზაფხული აბუაშვილის მომავლისთვის გადამწყვეტი იქნება, ბრისტოლ სიტი კი ქართველი ვინგერის გადაბირებას კვლავ ცდილობს.

გიორგის შესახებ ინფორმაცია ფრანგულ პრესაშიც ვრცელდება. როგორც იწერება, მის დამატებას აქტიურად ლიგა 2-ის გუნდი გინგამი ცდილობს და მოთამაშის დათანხმებასთან ახლოსაც არის. აბუაშვილით ზურიკო დავითაშვილის სენტ-ეტიენიც ინტერესდებოდა, თუმცა როგორც ჩანს, უპირატესობას სწორედ გინგამი ფლობს.