ინგლისის ნაკრებში დროებითი მწვრთნელი დაინიშნა

ინგლისის საფეხბურთო ასოციაციის განცხადებით ლი კარსლი ინგლისის ეროვნული ნაკრების დროებით მთავარ მწვრთნელად დაინიშნა.

კარსლი ინგლისის 21-წლამდე ნაკრების მწვრთნელი 2021 წლიდან იყო და გუნდს 1984 წლის შემდეგ პირველი ევროპის ჩემპიონატი მოაგებინა, რომელიც საქართველოში გაიმართა.

50 წლის სპეციალისტი ევრო 2020-ზე, 2022 წლის მუნდიალსა და ევრო 2024-ზე გარეთ საუთგეიტის ტექნიკური გუნდის წევრიც იყო. საკლუბო დონეზე კარსლი ქოვენთრი სიტიში, შეფილდ იუნაიტედში, ბრენტფორდში, მანჩესტერ სიტისა და ბირმინგემ სიტიში მუშაობდა.

საფეხბურთო კარიერაში ბირმინგემში დაბადებულმა ნახევარმცველმა 340 მატჩი ჩაატარა და ირლანდიის ნაკრების მაისური 40 შეხვედრაში მოირგო.

ლი კარსლი ინგლისის ნაკრებში მუშაობას უკვე შეუდგა და მისი დებიუტი მოახლოებულ ერთა ლიგაზე შედგება, სადაც სამი ლომი B2 ჯგუფში ფინეთის, საბერძნეთისა და ირლანდიის ნაკრებთან ერთადაა.

შეგახსენებთ, რომ 8-წლიანი მუშაობის შემდეგ გარეთ საუთგეიტმა ევრო 2024-ის დასრულებისთანავე ნაკრების მთავარი მწვრთნელის პოსტი დატოვა და ინგლისელებს დაემშვიდობა.