ირანის კაპიტანი ფიფას მწვავედ აკრიტიკებს

ირანის ეროვნული ნაკრების კაპიტანმა, მეჰდი ტარემიმ ფიფა და მისი პრეზიდენტი ჯანი ინფანტინო მკაცრად გააკრიტიკა.

ტარემიმ მიმდინარე მსოფლიო ჩემპიონატს „კატასტროფული“ უწოდა და ორგანიზატორები გუნდის მიმართ უსამართლო მოპყრობაში დაადანაშაულა.

ირანელების უკმაყოფილება დაკავშირებულია ვიზების პრობლემებთან, რის გამოც 11 უფროსი თანამდებობის პირი გუნდთან ერთად ტურნირზე ვერ გაემგზავრა, ასევე რთულ ლოჯისტიკურ პირობებთან - გუნდი იძულებულია მუდმივად მექსიკის ქალაქ ტიხუანასა და აშშ-ის ქალაქებს შორის იმოგზაუროს.

ტარემის თქმით, ფიფამ არ შეასრულა დაპირებები, რომლებიც ინფანტინომ ჯერ კიდევ პირველი ტურის შემდეგ გასცა.

მთავარმა მწვრთნელმა ამირ ღალენოიმ კი აშშ-ის მიმართ გამოთქვა პრეტენზიები. მისი თქმით, მიმდინარე სამხედრო კონფლიქტის გამო გუნდი იძულებული გახდა საწვრთნელი ბაზა შეეცვალა, რაც ფიზიკური აღდგენის პროცესზე უარყოფითად აისახა. ღალენოიმ ფიფას მოუწოდა, სამომავლოდ არ დაუშვას მასპინძელი ქვეყნების მხრიდან ნაკრებების მიმართ მსგავსი დისკრიმინაციული დამოკიდებულება.

მიუხედავად ამ სირთულეებისა, ირანის ნაკრებს კვლავ აქვს შანსი, ტურნირის საუკეთესო მესამეადგილოსნებს შორის მოხვდეს და 1/32-ფინალში გავიდეს.