იუვენტუსი მთავარ მწვრთნელთან, ლუჩანო სპალეტისთან კონტრაქტს გაახანგრძლივებს.
მხარეები ახალ კონტრაქტს 2027 წლამდე გააფორმებენ, რომელიც მისი კიდევ ერთი წლით, 2028-მდე გახანგრძლივების ოფციასაც ითვალისწინებს.
La Gazzetta dello Sport-ის ინფორმაციით, მოსალოდნელია, რომ ხელშეკრულებას ხელი კათოლიკურ აღდგომამდე მოეწერება, რომელიც წელს 5 აპრილს აღინიშნება.
სპალეტი ტურინულ გუნდს სათავეში 2025 წლის ოქტომბერში ჩაუდგა. ამ დროისთვის ბიანკონერი სერია A-ს სატურნირო ცხრილში მე-5 ადგილს იკავებს და 29 ტურის შემდეგ 53 ქულა აქვს.
მოქმედი ხელშეკრულება მხარეებს შორის სეზონის ბოლომდეა გათვალისწინებული, თუმცა როგორც ჩანს, სპალეტის მუშაობით ტურინში კმაყოფილები დარჩნენ და მისი დატოვება გადაწყვიტეს.
