ეროვნული ლიგის 2025 წლის სეზონის გამარჯვებული იბერია 1999 გახდა - ჩემპიონობა ზედიზედ მეორედ, ისტორიაში კი მესამედ მოიპოვეს.
აწ უკვე დასრულებულ სეზონში გაჩემპიონებაში ყველაზე მასშტაბური წვლილი ჰქონდა აგვისტოში ესპანურ კადისში წასულ იური ტაბატაძეს, რომელმაც 20 თამაში ჩაატარა და ყველაზე მეტ - 15 გოლში მიიღო მონაწილეობა (11 გოლი და 4 ასისტი), 14 გოლში მონაწილეობდა კაპიტანი გიზი მამაგეიშვილი (6 გოლი და 8 ასისტი), ხოლო ლუკა სილაგაძემ 10 გოლი შექმნა - 4 გოლი და 6 ასისტი.
ასევე აღსანიშნავია მარცხენა მცველი გიორგი ჯინჯოლავა, რომელმაც გადამწყვეტ ტურებში განსაკუთრებულად მოუმატა და ბოლო 6 შეხვედრაში 5 გოლი შექმნა - 3-ჯერ თავად გაიტანა, 2-ჯერ საგოლე პასი გააკეთა.
7 გოლი მოაგროვა ამირან ძაგანიამ - მათგან 4 ცვლილებაზე შესვლის შემდეგ შეაგდო. სწორედ ცვლილებიდან დინამო თბილისს ერთადერთი და 3 ქულის მომტანი გოლი ორ სხვადასხვა შეხვედრაში გაუტანა - მაისსა და ნოემბერში.
მნიშვნელოვანი და გამოსაყოფია ვეტერანი მეკარის, გიორგი მაკარიძის ეფექტიანი თამაში - 35 წლის გოლკიპერმა ჩემპიონის კარი 31 ტურში დაიცვა და მათგან 20 შეხვედრა გოლგაუშვებლად ჩაამთავრა (ჯამში 18 ბურთი გაუშვა).
აქვე ვთქვათ, რომ ამ წარმატების შემდეგ, იბერიელებმა უშუალოდ ჩემპიონატის ყველაზე ტიტულოვანი გუნდების სიაში სუფთა მე-3 ადგილზე აინაცვლეს - აქამდე მე-3 პოზიციას ვიტ ჯორჯიასთან, ზესტაფონთან, რუსთავთან და დინამო ბათუმთან იყოფდნენ (ყველა მათგანი 2-გზის ჩემპიონია).
იბერიაზე წინ 19-გზის ჩემპიონი დინამო თბილისი და 4-გზის ჩემპიონი ტორპედო ქუთაისი არიან. 2-გზის ჩემპიონები წინა აბზაცში ჩამოვთვალეთ, ერთხელ კი ტიტული სამტრედიას, გორის დილასა და ბოლნისის სიონს აქვთ მოგებული.
