ჯოკოვიჩი მადრიდის ღია პირველობიდან მოიხსნა

მსოფლიოს რეიტინგის ყოფილი ლიდერსა და გრანდ სლემის 24-გზის გამარჯვებულ ნოვაკ ჯოკოვიჩს მას შემდეგ არ უთამაშია, რაც დაახლოებით ერთი თვის წინ ინდიან უელსის ტურნირის მეოთხე რაუნდში ბრიტანელ ჯეკ დრეიპერთან დამარცხდა.

„მადრიდში, სამწუხაროდ, წელს ვერ შევძლებ მონაწილეობას, ვაგრძელებ აღდგენას, რათა მალე დავბრუნდე. Hasta pronto!“ - დაწერა 38 წლის სერბმა ინსტაგრამზე.

ამჟამინდელი რეიტინგის მეოთხე ნომერმა თებერვლის დასაწყისში ავსტრალიის ღია პირველობის ფინალში კარლოს ალკარასთან წააგო, რის შემდეგაც მიანიშნა, რომ კარიერის დასრულება შესაძლოა ახლოს იყოს.

მან თებერვლის ბოლოს დოჰას ტურნირიდან დაღლილობის გამო მოხსნა თავი.

ინდიან უელსზე მეოთხე რაუნდამდე მიაღწია, თუმცა შემდეგ მხრის ტრავმის გამო მაიამისა და მონტე-კარლოს მასტერსის 1000-იან ტურნირებზე მონაწილეობაზე უარი თქვა. წელს მან მხოლოდ ორ ტურნირში მიიღო მონაწილეობა.

ეს სიახლე კიდევ ერთი დარტყმაა ჯოკოვიჩისთვის, რადგან დრო იწურება, რათა მზად იყოს წლის მეორე გრანდ სლემისთვის - საფრანგეთის ღია პირველობისთვის, რომელიც ერთ თვეში პარიზში იწყება.