UFC 334-ის ფარგლებში გამართული ერთ-ერთი ყველაზე დიდი ინტერესის მქონე დაპირისპირება კაილა ჰარისონის შთამბეჭდავი გამარჯვებით დასრულდა.
ამერიკელმა სპორტსმენმა ქალთა სუპერმსუბუქი წონითი დივიზიონის საჩემპიონო ქამრის დაცვა ლეგენდარულ ამანდა ნუნეშთან მოახერხა. მან მოწინააღმდეგე მეოთხე რაუნდში მახრჩობელა ილეთით დააფინიშა და ტიტული შეინარჩუნა.
ბრძოლის დებიუტი ბრაზილიელის უპირატესობით წარიმართა. ნუნეში დგომში საკმაოდ სახიფათოდ უტევდა და ჩემპიონს რამდენიმე მძიმე დარტყმაც გაუტარა. თუმცა, ჰარისონმა სიტუაციის გამოსწორება სწრაფადვე შეძლო და თავისი მთავარი იარაღი, ოლიმპიური დონის ძიუდო და ჭიდაობა აამოქმედა. ამერიკელმა მეტოქე პარტერში გადაიყვანა, სადაც მეორე და მესამე რაუნდებში სრულად დომინირებდა, ნუნეშის პოზიციის შეცვლის მცდელობები კი უშედეგო აღმოჩნდა. მესამე რაუნდის ბოლოს ჰარისონმა მეტოქეს რამდენიმე ზუსტი დარტყმაც მიაყენა.
ყველაფერი მეოთხე რაუნდში გადაწყდა. კრიტიკულ მომენტში ჰარისონმა ბრაზილიელის დარტყმა დაიჭირა და იგი ძირს დააგდო. ჩემპიონი ელვის სისწრაფით აღმოჩნდა მოწინააღმდეგის ზურგს უკან და მახრჩობელა ილეთი უნაკლოდ შეასრულა, რამაც ნუნეში აიძულა, დანებების ნიშანი ეჩვენებინა.
კაილა ჰარისონისთვის ეს საჩემპიონო ქამრის პირველი წარმატებული დაცვა იყო. მან ტიტული 2025 წლის ივნისში, ჯულიანა პენიასთან მოპოვებული გამარჯვებით დაისაკუთრა.
