კამერის კაბელი: რას აპროტესტებენ ნორვეგიელები ბელინგემის ეპიზოდში

ერლინგ ჰოლანდის მამამ, ალფ-ინგე ჰოლანდმა, მსოფლიო ჩემპიონატის მეოთხედფინალში ინგლისთან დრამატული მარცხის (1:2) შემდეგ, მთავარი მსაჯი კლემან ტიურპენი გააკრიტიკა.

ნორვეგიის ნაკრების ყოფილმა ფეხბურთელმა, რომელიც პირდაპირი განცხადებებით გამოირჩევა, სოციალურ ქსელ X-ში პოსტი გამოაქვეყნა: „ყოჩაღ, ბელინგემ და ყოჩაღ, მსაჯო“.

53 წლის ჰოლანდის პროტესტის მიზეზი ინგლისელთა პირველი საგოლე შეტევა გახდა. ნორვეგიელთა მტკიცებით, სანამ ჯუდ ბელინგემი ანგარიშს გაათანაბრებდა, ბურთი ჰაერში სტადიონის მოძრავი კამერის (SkyCam) დამჭერ კაბელს შეეხო. წესების მიხედვით, ასეთ დროს თამაში უნდა გაჩერდეს და გოლი არ უნდა ჩაითვალოს.

თუმცა, ფიფამ მატჩის მსვლელობისას სპეციალური განცხადება გაავრცელა. ორგანიზაციის განმარტებით, ბურთში ჩამონტაჟებულმა სპეციალურმა სენსორმა კაბელთან კონტაქტი ან მიმართულების შეცვლა ვერ დააფიქსირა, რის გამოც გოლი აბსოლუტურად წესების დაცვით ჩაითვალა. მიუხედავად ტექნოლოგიური მტკიცებულებისა, უფროსმა ჰოლანდმა საკუთარი ვერდიქტი უკვე გამოიტანა და წაგება მსაჯს დააბრალა.