ბარსა კამპ ნოუს ისევ დატოვებს.
ბარსელონამ ლა ლიგას სთხოვა, ნება დართოს, რომ 2027/2028 წლების სეზონის პირველი ნახევრის საშინაო მატჩები ლუის კომპანისის სახელობის ოლიმპიურ სტადიონზე გამართოს, - იტყობინება გამოცემა Sport.es.
წყაროს ინფორმაციით, ეს გადაწყვეტილება კამპ ნოუს რეკონსტრუქციის მორიგ ეტაპს უკავშირდება. 2027 წლის ზაფხულში კლუბი არენაზე ახალი სახურავის მონტაჟის დაწყებას გეგმავს. სამუშაოები ივნისში დაიწყება და დაახლოებით ოთხნახევარ თვეს გასტანს. სახურავის დამონტაჟების გარდა, სტადიონზე დამატებითი სამშენებლო სამუშაოებიც შესრულდება.
თუ ლა ლიგა მოთხოვნას დააკმაყოფილებს, ბარსელონა ოლიმპიურ სტადიონზე არა მხოლოდ ესპანეთის ჩემპიონატის, არამედ ჩემპიონთა ლიგის საშინაო შეხვედრების ჩატარებასაც აპირებს.
შეგახსენებთ, რომ კატალონიელები ლუის კომპანისის სახელობის არენაზე უკვე გამოდიოდნენ 2023/2024, 2024/2025 სეზონებში და 2025/2026 წლების სეზონის ნაწილში, სანამ კამპ ნოუზე ძირითადი სამუშაოები მიმდინარეობდა.
აღსანიშნავია, რომ მომავალ, 2026/2027 წლების სეზონში ბარსელონამ მატჩები კამპ ნოუზე უნდა ჩაატაროს, მიუხედავად იმისა, რომ არენის მოდერნიზაცია კვლავ გაგრძელდება. კერძოდ, კლუბი გეგმავს, გულშემატკივრებისთვის სტადიონის მესამე იარუსი ეტაპობრივად გახსნას.
