უეფას სუპერ თასის მატჩის წინ, სადაც ერთმანეთს პარი სენ-ჟერმენი და ასტონ ვილა დაუპირისპირდებიან, Sky Sports-მა ხვიჩა კვარაცხელიას შესახებ სტატია გამოაქვეყნა.
,,ეს იყო მსოფლიო ჩემპიონატი, რომელზეც ამბობდნენ, რომ ყველა ვარსკვლავმა გაიბრწყინა. თუმცა, მიუხედავად იმისა, რომ დიდმა სახელებმა ზაფხული მართლაც გაალამაზეს, საკლუბო ფეხბურთის დაბრუნება და ზალცბურგში გასამართი უეფას სუპერთასი ხვიჩა კვარაცხელიას შესაძლებლობას აძლევს, კვლავ ყურადღების ცენტრში მოექცეს.
25 წლის კვარაცხელია ჩემპიონთა ლიგის გასული სეზონის საუკეთესო ფეხბურთელად დასახელდა მას შემდეგ, რაც პარი სენ-ჟერმენმა მაისში ტიტული წარმატებით დაიცვა. აგვისტოში ის მოედანზე ბრუნდება და ზედიზედ მე-3 ტრიუმფისკენ ისწრაფვის, რათა ყველას შეგვახსენოს, რომ შესაძლოა ევროპის საუკეთესო ფეხბურთელი მსოფლიო ჩემპიონატზე საერთოდ არ ყოფილა.
მარკინიოსმა პსჟ-სთან ერთად ჩემპიონთა ლიგის თასი ორჯერ აღმართა. დეზირე დუემ და ვიტინიამ, შესაბამისად, მიუნხენსა და ბუდაპეშტში მატჩის საუკეთესო ფეხბურთელის ჯილდოები მიიღეს. უსმან დემბელეს კი კლუბის ისტორიაში პირველი ჩემპიონთა ლიგის ტრიუმფში შეტანილი წვლილისთვის ოქროს ბურთი გადაეცა.
თუმცა, თუ უნდა დავასახელოთ მთავარი კატალიზატორი იმისა, რაც უკვე დომინაციის ეპოქად ყალიბდება, ეს კვარაცხელიას მოსვლა იყო. გასული წლის იანვარში ნაპოლიდან შეძენილმა ქართველმა გავლენა მყისიერად მოახდინა. მის მისვლამდე პსჟ ევროპულ ასპარეზზე გარკვეულწილად იმედგაცრუებას ტოვებდა. გუნდს რაღაც აკლდა.
ახლა კი ეს პრობლემა აღარ არსებობს. კვარაცხელია დაეხმარა პსჟ-ს, ნამდვილ პრესინგის მანქანად ქცეულიყო. მისი ენერგიული და თავდადებული სათამაშო სტილი არა მხოლოდ იდეალურად მოერგო ლუის ენრიკეს მოთხოვნებს, არამედ, როგორც ჩანს, მის გარშემო მყოფ ფეხბურთელებზეც გარდამტეხი გავლენა მოახდინა და შეტევის ხაზში ახალი სტანდარტები დაამკვიდრა.
ამ სეზონის უეფას სუპერთასზე პსჟ-ს მეტოქე ასტონ ვილამ კარგად იცის, რა შეუძლია ქართველს. 2025 წლის 1/4 ფინალის პირველ შეხვედრაში სწორედ კვარაცხელიას ოსტატურმა მოძრაობებმა აქსელ დისასი ურთულეს მდგომარეობაში ჩააგდო. შეიძლება ითქვას, რომ იმ სეზონის პლეი-ოფში ეს პსჟ-სთვის ყველაზე რთული გამოცდა იყო.
გასულ სეზონში კი ტურნირის გადამწყვეტ ეტაპზე მისი როლი კიდევ უფრო მნიშვნელოვანი გახდა. პლეი-ოფის ეტაპიდან მოყოლებული, კვარაცხელიაზე მეტი გოლი არცერთ ფეხბურთელს არ გაუტანია. გარდა ამისა, ჩემპიონთა ლიგაზე ღია თამაშიდან შესრულებული საგოლე გადაცემების რაოდენობითაც პირველ ადგილზე გავიდა.
ეს უკვე შთამბეჭდავი მემკვიდრეობაა, რომელსაც ქართველი ქმნის. რა თქმა უნდა, პსჟ-ში გადასვლამდეც სწორედ ის იყო ფეხბურთელი, რომელმაც ნაპოლი ჩემპიონობამდე მიიყვანა, კლუბის ხანგრძლივი ლოდინი დაასრულა და გააქარწყლა მითი, თითქოს ნეაპოლში მსგავსი რამ მხოლოდ დიეგო მარადონას შეეძლო, სწორედ აქედან გაჩნდა მეტსახელი „კვარადონა“.
ქართველის მიმართ განსაკუთრებული ინტერესი იმითაც არის განპირობებული, რომ ის მართლაც უნიკალური შემთხვევაა. მსოფლიო ფეხბურთში ძნელად მოიძებნება სხვა ფეხბურთელი, რომელიც მას სტილითა და კარიერული ისტორიით ჰგავს. მაგალითად, პარიზში მისი ბევრი თანაგუნდელი საფრანგეთის საფეხბურთო სისტემის მიერ შექმნილი ტალანტების უწყვეტი ნაკადის ნაწილია.
ინგლისში აკადემიების სისტემის რეფორმამ ახალგაზრდა ფეხბურთელების განვითარებას ხელი შეუწყო. ამას თუ პრემიერ ლიგის აღმავლობასა და იმ ფაქტს დავუმატებთ, რომ ახალგაზრდები უმაღლესი დონის გარემოში იზრდებიან, ვარსკვლავების გამოჩენა ალბათ არც ისე გასაკვირია. კვარაცხელიას ისტორია განსხვავებულია.
2023 წელს ყაზანის რუბინში მის ყოფილ მწვრთნელ ლეონიდ სლუცკისთან საუბრისას მან ეს კარგად შეაჯამა: ,,იტალიაში გადასვლამდე მის შესახებ თითქმის არავინ იცოდა და ეს გასაგებიცაა."
რუსმა სპეციალისტმა დასამახსოვრებელი ფრაზაც თქვა:
ვულოცავ ნაპოლის, რადგან მათ ლატარია მოიგეს.
სლუცკი კვარაცხელიას მოედანზე „არანორმალურ აზროვნებაზეც“ საუბრობდა - მის უნარზე, ყველაფერი სხვებისგან განსხვავებულად გააკეთოს. ამ თემაზე საუბრისას ჩისკო მუნიოსმა, ესპანელმა, რომელსაც კვარაცხელიას ყოფილ კლუბ დინამო თბილისში უთამაშია და უმუშავია, აღნიშნა, რომ ეს თვისება ქართველის გარემომ ჩამოაყალიბა.
„ესპანეთში ვჩერდებით და პასს ვაკეთებთ, ამას შესაძლოა სავარჯიშო მოედანზე ან სკოლაში ვსწავლობთ“, - უთხრა ჩისკომ Sky Sports-ს.
საქართველოში კი ქუჩის ტალანტია. საქართველოში ფეხბურთს ქუჩაში თამაშობენ. მათ ბრძოლა და ფიზიკური კონტაქტი უწევთ. ამის სკოლაში სწავლება რთულია.
ამის მიუხედავად, დევიდ ვები, რომელიც კვარაცხელიასთან საქართველოს ნაკრებში მუშაობდა, იხსენებს, რომ მისი სავარჯიშო მოედნიდან გაყვანა ნამდვილი კოშმარი იყო.
ის მთლიანად პროცესზეა ორიენტირებული. ამას ეფექტისთვის არ აკეთებს. ასეთი პირველივე დღიდან იყო.
ამ კონტექსტში, შესაძლოა, საქართველოს ნაკრების მიერ ამ ზაფხულის მსოფლიო ჩემპიონატზე ვერმოხვედრა კვარაცხელიასთვის ერთდროულად წყევლაც იყო და კურთხევაც. მან საქართველო ევრო 2024-ზე გაიყვანა, შემდეგ კი გასულ წელს საკლუბო მსოფლიო ჩემპიონატზეც ითამაშა. ბოლო რამდენიმე წლის განმავლობაში ეს მისთვის დასვენებისა და ძალების აღდგენის პირველი რეალური შესაძლებლობა იყო.
თუ ეს მის ფიზიკურ მდგომარეობას დაეხმარება, შესაძლოა ოქროს ბურთისთვის ბრძოლაში ხელი შეუშალოს. კევინ კიგანმა ეს ჯილდო მსოფლიო ჩემპიონატის წელს მაშინ მოიგო, როდესაც ინგლისი ტურნირზე საერთოდ ვერ მოხვდა, თუმცა იმ პერიოდში პრიზის მიღება მხოლოდ ევროპელ ფეხბურთელებს შეეძლოთ, მსოფლიო ჩემპიონი კი არგენტინა გახდა.
2026 წელს გასათვალისწინებელია მსოფლიო ჩემპიონი ესპანეთის ნაკრების არაერთი ფეხბურთელი, ხოლო კილიან მბაპესა და ჰარი კეინის მიერ კლუბსა და ნაკრებში ნაჩვენები შთამბეჭდავი შედეგებიც სერიოზული არგუმენტია. თუმცა, სუპერთასი კვარაცხელიასთვის კიდევ ერთი შესაძლებლობაა, კვლავ ყველას შეახსენოს საკუთარი ძალა.
მისი ინდივიდუალური ოსტატობა კვლავ არა მხოლოდ ალამაზებს, არამედ წინ მიუძღვის იმ გუნდის თამაშს, რომელიც ამჟამად ევროპაში საუკეთესოა. ხვიჩა კვარაცხელია, გასული სეზონის ჩემპიონთა ლიგის გამორჩეული ფეხბურთელი და პარი სენ-ჟერმენის მებრძოლი გარემარბი, ახალი გამოწვევებისთვის მზადაა.
