"ხვიჩაზე ნაკლები არაა" - რა თქვა ქეცბაიამ თორნიკე კვარაცხელიაზე

დინამო თბილისის მთავარმა მწვრთნელმა, თემურ ქეცბაიამ, კონფერენს ლიგის მე-2 საკვალიფიკაციო ეტაპის პირველ მატჩში, ჟალგირის ვილნიუსთან 3:0 გამარჯვების შემდეგ, თორნიკე კვარაცხელიას შესახებ დასმულ კითხვას უპასუხა.

"მეტოქეებს მისი შეჩერება უჭირდათ და ჯარიმებსაც ამიტომ იღებდნენ, ბევრი პრობლემა შეუქმნა. არაერთხელ ჩაარტყეს, წააქციეს, თუმცა ამას უნდა შეეჩვიოს, ეს ბავშვების ფეხბურთი აღარაა, დიდების თამაშია.

ჯერ კიდევ 16 წლისაა, 60 წუთის განმავლობაში საუკეთესო იყო, 90 წუთის სათამაშოდ კი ბოლომდე მზად არაა. საერთო ჯამში, მისი თამაშით კმაყოფილი ვარ.

კარგი ისაა, რომ უყვარს შრომა როგორც ვარჯიშებზე, ისე მატჩებისას. პირველივე დღიდან გვიჩვენებს, რა ნიჭი აქვს და რა ფეხბურთის თამაში შეუძლია. ხვიჩაზე ნაკლები არ არის. მთელი ცხოვრება წინ აქვს. იმედია, ამ ავანსებს გაამართლებს, ჯერ ჩვენ დაგვეხმარება და შემდეგ დიდ გუნდში, დიდ დონეზე გააგრძელებს თამაშს", - თქვა ქეცბაიამ.

16 წლისა და 166 დღის ასაკში, თორნიკე კვარაცხელია, ევროტურნირების ეგიდით, სასტარტო შემადგენლობაში პირველად მოხვდა და ჟალგირის ვილნიუსის წინააღმდეგ 68 წუთი გაატარა მოედანზე - აქტიური იყო, თამაშს ამწვავებდა, რამდენიმე ჩვეული დრიბლინგიც ჰქონდა, მეტოქეს ყვითელი ბარათიც მიაღებინა და ასისტამდე ცოტა დააკლდა.

დინამო თბილისი 3:0 გამარჯვების შემდეგ, ჟალგირის ვილნიუსს ლიეტუვაში, 30 ივლისს შეხვდება. იქამდე, 26 ივლისს, დავით ყიფიანის სახელობის, საქართველოს თასის მატჩია - ლანჩხუთში, იქაური გურიას წინააღმდეგ.

დინამოსა და ჟალგირისს შორის გამარჯვებული, კონფერენს ლიგის მე-3 საკვალიფიკაციო ეტაპზე, კვიპროსულ პაფოსს ან ხორვატულ ჰაიდუკს დაუპირისპირდება.

"ბიჭებმა კარგი ფეხბურთი და სანახაობა აჩვენეს" - ქეცბაია ჟალგირისთან გამარჯვების შემდეგ