კლუბები, რომლებიც შეიძლება ამ კვირაში გახდნენ ჩემპიონები

ევროპული ფეხბურთი ფინალურ ეტაპზე გადადის და მომდევნო დღეებში დიდ ემოციებს გვპირდება. კვირის ბოლომდე შესაძლოა ოთხი ლიგის ჩემპიონის ვინაობა გადაწყდეს.

ლა ლიგა

ბარსას აქვს შესაძლებლობა ლა ლიგა 29-ედ მოიგოს, თუმცა ტიტულის ზეიმი ამ უქმეებზე მხოლოდ მათზე არ არის დამოკიდებული. კატალონიური გუნდი, შაბათს ოსასუნას ესტუმრება. იმისათვის, რომ ამ კვირაშივე გახდნენ ჩემპიონები, ბარსელონამ საკუთარი მატჩი უნდა მოიგოს და იმედი იქონიოს, რომ რეალი ესპანიოლს ვერ დაამარცხებს.

სერია ა

სერია ა-ს დასრულებამდე ოთხი ტურით ადრე ინტერი 79 ქულით ცხრილის სათავეშია (10 ქულით უსწრებს ნაპოლის და 12 ქულით მილანს). მილანური გუნდი კვირას პარმას უმასპინძლებს და ტიტულის მოსაპოვებლად უბრალო გამარჯვებაც საკმარისი იქნება. ინტერი შესაძლოა ჩემპიონად თამაშამდეც გამოცხადდეს. ეს იმ შემთხვევაში მოხდება, თუ ნაპოლი შაბათს კომოსთან წააგებს, ხოლო მილანი კვირა შუადღეს სასუოლოს ვერ დაამარცხებს. თუ ნაპოლი ფრეს ითამაშებს, ინტერს პარმასთან იგივე შედეგი დასჭირდება. მილანის მოგების შემთხვევაში კი, ინტერს საზეიმოდ მინიმუმ ერთი ქულა დასჭირდება.

სუპერ ლიგა

გალათასარაის ბოლოდროინდელი დომინაცია თურქეთის ლიგაში შესაძლოა ამ შაბათს კიდევ ერთხელ დადასტურდეს. სეზონის დასრულებამდე სამი ტურით ადრე კლუბი 74 ქულით ლიდერობს ცხრილს და შვიდი ქულით უსწრებს თავის მარადიულ მეტოქეს, ფენერბახჩეს (67). გალათასარაი ზედიზედ მეოთხედ გახდება ჩემპიონი უკვე ამ შაბათს, თუ სამსუნსპორს დაამარცხებს.

პორტუგალიის ლიგა

2021/22 წლების სეზონის შემდეგ ტიტულის მოლოდინში მყოფი პორტუ პორტუგალიის ლიგის ფინალურ სამ ტურს ბენფიკასთან შვიდქულიანი უპირატესობით ხვდება. დრაკონები ჩემპიონები შესაძლოა ალვერკასთან შაბათს გასამართ მატჩამდეც გახდნენ. ამისთვის საჭიროა, რომ ბენფიკამ დღის პირველ ნახევარში ფამალიკაოსთან წააგოს. ბენფიკას ფრეს შემთხვევაში, პორტუს პორტუგალიის ლიგის მწვერვალზე დასაბრუნებლად ალვერკასთან მხოლოდ დამარცხებისთვის თავის არიდება დასჭირდება.