ბაიერნის მთავარმა მწვრთნელმა, ვინსენტ კომპანიმ, გულდაწყვეტა ვერ დამალა იმის გამო, რომ სამშაბათს პარიზში გამართულ ისტორიულ მატჩს სათადარიგოთა სკამიდან ვერ ადევნებდა თვალს. ჩემპიონთა ლიგის ნახევარფინალის პირველი შეხვედრა პსჟ-სა და ბუნდესლიგის ჩემპიონს შორის ნამდვილ სანახაობად იქცა, თუმცა კომპანი ყვითელი ბარათების გამო დისკვალიფიცირებული იყო და თამაშს ლოჟიდან უყურებდა.
კომპანიმ განაცხადა:
ეს სულაც არ არის სასიამოვნო. როდესაც ორი გუნდი მოედანზე ასეთი განწყობით გადის სათამაშოდ, მსგავსი რამ მოსალოდნელია. გასვლაზე ხუთი გოლის გაშვება ჩვეულებრივ დასასრულს ნიშნავს, მაგრამ ჩვენ ოთხი გავიტანეთ და შეგვეძლო კიდევ ორი ან სამი გაგვეტანა. რწმენა 100 პროცენტით გვაქვს. ჩვენ გვჭირდება ჩვენი გულშემატკივარი და ისეთივე ვნება, როგორიც მადრიდის რეალთან მატჩში იყო.
კომპანიმ საკუთარი არყოფნას „აბსოლუტური კატასტროფა“ უწოდა და აღნიშნა, რომ ლოჟიდან მითითებების მიცემა მოედანზე არსებულ ემოციებთან ახლოსაც ვერ მივა. მან განსაკუთრებული მადლობა გადაუხადა თავის ასისტენტს, აარონ დანკსს და სამწვრთნელო შტაბს ენერგიისა და მენტალიტეტის შენარჩუნებისთვის.
საპასუხო მატჩის წინ კომპანიმ ბაიერნის გულშემატკივრებს უჩვეულო თხოვნით მიმართა:
ერთი თხოვნა მაქვს. თუ ვინმეს ბილეთი აქვს ნაყიდი და თამაშის დღეს თავს კარგად ვერ იგრძნობს, გთხოვთ, დარჩით სახლში და ბილეთი ყველაზე ენერგიულ ადამიანს გადაეცით, ვისაც კი იპოვით. ჩვენ გვჭირდება ალიანც არენის მთელი ძალა. მთავარია მოვიგოთ, ანგარიშს მნიშვნელობა არ აქვს. უბრალოდ გამარჯვება და სრული მხარდაჭერა გვჭირდება.
