ქართველი თავდამსხმელი უკვე აღარ არის მხოლოდ დრიბლინგის ოსტატი - ის სრულყოფილ, მრავალმხრივ ფეხბურთელად ჩამოყალიბდა: მისი კანდიდატურა ოქროს ბურთზე აღარ უნდა შეფასდეს არასერიოზულად - წერს იტალიური Goal.
,,გასული სეზონის ზამთრის სატრანსფერო ფანჯრის დროს განხორციელებული მოულოდნელი ტრანსფერი იმ დროს ორივე მხარისთვის იდეალურ გამოსავლად ჩანდა.
თუმცა, უკან რომ მივიხედოთ, ხვიჩა კვარაცხელიას ნაპოლიდან პსჟ-ში გადასვლამ უზარმაზარი გავლენა მოახდინა და მის კარიერაში რეალური ევოლუცია გამოიწვია: დღეს ის სრულყოფილი, მრავალმხრივი ჩემპიონია.
ფეხბურთელი, რომელმაც უკვე დაამტკიცა თავისი უდიდესი ნიჭი, ახლა ოქროს ბურთის სერიოზული კანდიდატია, თუმცა მის საზიანოდ საქართველოს ნაკრების მსოფლიო ჩემპიონატზე ვერ გასვლამ შესაძლოა მის ამბიციებზე უარყოფითად იმოქმედოს.
კვარაცხელია შეუჩერებელია: უმაღლესი დონის დუბლი ბაიერნის წინააღმდეგ
ის უკვე აღარ არის უბრალოდ კარგად აწყობილი სისტემის ნაწილი, როგორიც პსჟ-შია, არამედ საკუთარი ბედის მთავარი შემოქმედია - ის ღერძია, რომელზეც მისი თანაგუნდელები ეყრდნობიან.
როდესაც ბაიერნი პარკ დე პრენსზე იგებდა და თითქმის ანგარიშის გაზრდასთან ახლოს იყო, ქართველის ერთი ჯადოსნური ეპიზოდიც კი საკმარისი აღმოჩნდა, რომ ბალანსი მყისიერად აღდგენილიყო, რაც აჩვენებს, რომ პარიზელების გასათიშად გაცილებით მეტი არის საჭირო.
თამაში, დრიბლინგი, პასები, მაგრამ ასევე ბურთის გარეშე დიდი შრომა, მუდმივი პრესინგი და მოედანზე ყველგან ყოფნა - ეს არის თვისებების კომბინაცია, რომელიც აერთიანებს ვინგერს, ნახევარმცველს, შემტევ ნახევარმცველსა და მომენტის დამსრულებელს და გვიჩვენებს მოთამაშეს, რომელიც სრულყოფილად ჩამოყალიბდა.
და თითქოს ეს საკმარისი არ იყო, მეორე ტაიმში დუბლიც გაიფორმა, რითაც ნამდვილი ჩემპიონური თამაში დააგვირგვინა.
ჩემპიონთა ლიგა მისი სცენაა
ვინც ფიქრობს, რომ კვარაცხელიამ უბრალოდ შემთხვევით იბრწყინა ერთ უცნაურ საღამოს, ძალიან ცდება.
ჩემპიონთა ლიგის ბოლო 15 მატჩში ქართველმა ვარსკვლავმა 11 გოლი გაიტანა და 5 საგოლე გადაცემა შეასრულა.
ეს გადამწყვეტი სტატისტიკაა, რომელიც მას კიდევ ერთი ფინალისკენ უბიძგებს, გასული სეზონის საოცარი ფინალის შემდეგ, როდესაც, როგორც ერთ-ერთმა მთავარმა გმირმა, ინტერთან 5-0 გამარჯვებაში დიდი წვლილი შეიტანა.
360 გრადუსიანი კლასი: იმსახურებს თუ არა ოქროს ბურთს?
26 გოლი და 17 საგოლე გადაცემა პსჟ-ს მაისურით 75 მატჩში, მათ შორის 20 ჩემპიონთა ლიგაზე - სწორედ მაშინ, როცა დაძაბულობა პიკს აღწევს.
ჩემპიონები სწორედ ამ დეტალებით იცნობიან: არა სუსტ გუნდებთან ჰეთ-ტრიკებით ან არასტაბილური თამაშებით.
კვარა მუდმივია - ნიჭი, რომელიც დიდ საღამოებზე ანათებს. მაშ, რატომ არ უნდა ვირწმუნოთ მისი ოქროს ბურთის შანსი?
მისი ყველაზე დიდი პრობლემა არის ის, რომ ვერ ეყრდნობა ეროვნულ ნაკრებს, რომელიც დიდ ტურნირებზე სრულფასოვან კონკურენციას გაწევს - საკმარისია გავიხსენოთ საქართველოს მსოფლიო ჩემპიონატზე ვერ გასვლა, თუმცა რადგან ეს ინდივიდუალური ჯილდოა, უკვე აშკარაა, რომ ნაპოლის ყოფილი ფეხბურთელი მსოფლიო ფეხბურთის ელიტას ეკუთვნის, ისეთ ფენომენებთან ერთად, როგორებიც არიან დემბელე, ოლისე, ლამინ იამალი და მბაპე.
ზეედორფი: ,,კვარაცხელია მსოფლიოში საუკეთესო ფეხბურთელია"
