კონგოს დემოკრატიული რესპუბლიკის მთავარი მწვრთნელი სებასტიენ დესაბრი მსოფლიო ჩემპიონატის მატჩის შემდეგ გამართულ პრესკონფერენციაზე იმყოფებოდა, როდესაც მას მამის გარდაცვალების შესახებ აცნობეს.
კონგოს დემოკრატიული რესპუბლიკის ზღაპრული სვლა 2026 წლის მსოფლიო ჩემპიონატზე ინგლისთან, 1/16-ფინალურ ეტაპზე დასრულდა.
კონგო მატჩის 75-ე წუთამდე 1:0-ს იგებდა, თუმცა შემდეგ ჰარი კეინმა ანგარიში გაათანაბრა. ინგლისის თავდამსხმელმა 86-ე წუთზეც გაიტანა და თავისი გუნდი 2:1 გამარჯვებამდე და მერვედფინალის საგზურამდე მიიყვანა.
მატჩის დასრულების შემდეგ, როდესაც დესაბრი ჟურნალისტებთან საუბრობდა, მას გუნდის პრესატაშემ ტრაგიკული ინფორმაცია გადასცა, მისი მამა გარდაიცვალა.
სანამ კონგოს ნაკრები მოედანზე ინგლისთან მძიმე ბრძოლაში იყო ჩართული, დესაბრს წარმოდგენაც არ ჰქონდა, რა ამბავი ელოდა.
სწორედ პრესკონფერენციის დროს შეატყობინეს მას ეს მძიმე დანაკარგი. მისი სახის გამომეტყველება ყველაფერს ამბობდა, თუმცა მან ემოციების კონტროლი შეძლო, დამსწრეებს მადლობა გადაუხადა და პრესკონფერენცია დაასრულა.
მიუხედავად ამ ტრაგიკული დასასრულისა, დესაბრმა ქვეყნის ფეხბურთის ისტორიაში მნიშვნელოვანი კვალი დატოვა.
მისი ხელმძღვანელობით კონგოს დემოკრატიული რესპუბლიკა პირველად გავიდა მსოფლიო ჩემპიონატზე 1974 წლის შემდეგ.
2026 წლის ტურნირზე კონგოს ნაკრებმა პირველად გაიტანა გოლი, პირველად მოიპოვა გამარჯვება და ისტორიაში პირველად გავიდა მსოფლიო ჩემპიონატის პლეი-ოფში.
