დანიელ კორმიე მოხარულია, რომ ილია თოფურიასა და ჯასტინ გეიჯის შორის გარკვეული უთანხმოება გაჩნდა.
მომავალ კვირას, თვეების განმავლობაში მიმდინარე მზადებისა და აჟიოტაჟის შემდეგ, UFC თეთრი სახლის ღონისძიება საბოლოოდ აიღებს სტარტს.
მთავარ ბრძოლაში ილია თოფურია მსუბუქი წონის ტიტულის გაერთიანებას შეეცდება დროებით ჩემპიონ ჯასტინ გეიჯისთან, რომელიც თავის მხრივ ცდილობს, მესამე ცდით გახდეს უდავო ჩემპიონი. ბრძოლის სამზადისის განმავლობაში ორივე სპორტსმენი ერთმანეთის მიმართ პატივისცემას ინარჩუნებდა, თუმცა ამ კვირის დასაწყისში ვითარება შეიცვალა.
მატადორმა ბრძოლის პოპულარიზაციისთვის ახლახან სარეკლამო ვიდეო გამოუშვა, სადაც ესპანელმა სპეციალური თეთრი ვარდი მოათავსა გეიჯის ფრესკაზე, რომელიც ჩარლზ ოლივეირას, მაქს ჰოლოუეისა და ალექსანდრ ვოლკანოვსკის ფრესკების გვერდით იყო გამოსახული. ამან გეიჯისგან მწვავე საპასუხო რეაქცია გამოიწვია, მან ჩემპიონს გაუგებრობა უწოდა და მის ბოლოდროინდელ განქორწინებაზე მიანიშნა.
მიუხედავად იმისა, რომ ზოგიერთი გულშემატკივრის აზრით გეიჯიმ ზღვარს გადააბიჯა, UFC-ის კომენტატორი დანიელ კორმიე რეალურად ამ თავდასხმის დიდი მომხრეა და აცხადებს, რომ მოსწონს როგორ გადავიდა ეს დაპირისპირება პირადულ ჭრილში:
ყოველთვის მომწონს, როდესაც ბრძოლას, განსაკუთრებით საჩემპიონო და ამ მასშტაბის შეხვედრას, ურთიერთშელაპარაკება ახლავს. გჭირდება ისეთი დეტალები ბრძოლის ირგვლივ, რაც რიგით გულშემატკივარს ათქმევინებს: 'ეს აუცილებლად უნდა ვნახო'... იმის დანახვა, რომ თავაზიანობა აღარ არის ისეთი აშკარა, როგორც ადრე, მომწონს. მიყვარს სიუჟეტური ხაზები... ამ ყველაფრის ფანი ვარ... ახლა უკვე ვგრძნობთ, რომ ბრძოლა გაცილებით მასშტაბური ხდება.
29 წლის მებრძოლთან მარცხმა, სპორტის ისტორიაში ამ ყველაზე მასშტაბურ ღონისძიებაზე, შესაძლოა გეიჯის კარიერის დასრულება გამოიწვიოს. 37 წლის სპორტსმენი UFC-ის კარიერის ფინიშს უახლოვდება და მატადორისგან მიღებულმა მძიმე ნოკაუტმა შესაძლოა წერტილი დაუსვას ერთ-ერთ ყველაზე სანახაობრივ კარიერას.
